गुगल भारतात करणार ७५ हजार कोटींची गुंतवणूक

गुगल भारतात करणार ७५ हजार कोटींची गुंतवणूक

मुख्य कार्यकारी अधिकारी सुंदर पिचाई यांची घोषणा 

नवी दिल्ली:  कोरोनाच्या साथीमुळे देशाच्या अर्थव्यवस्थेला फटका बसला असला तरिही येथील बाजारपेठेबद्दल गुंतवणूकदारांमध्ये असलेले आकर्षण आजही कमी झालेले नाही. आयटी क्षेत्रातील गुगल ही बलाढ्य कंपनी भारतामध्ये १० अब्ज डॉलर म्हणजे सुमारे ७५ हजार कोटी रुपयांची गुंतवणूक करणार आहे. गुगलचे मुख्य कार्यकारी अधिकारी (सीईओ) सुंदर पिचाई यांनी ही घोषणा केली आहे. 

गुगल कंपनीचा गुगल फॉर इंडिया हा व्यावसायिक प्रकल्प असून त्याअंतर्गत ही गुंतवणूक केली जाणार आहे. सुंदर पिचाई यांनी सांगितले की, भारताच्या अर्थव्यवस्थेला चालना देण्यासाठी गुगलने भारतात इतकी मोठी गुंतवणूक करण्याचे ठरवले आहे. पंतप्रधान नरेंद्र मोदी यांच्या डिजिटल इंडिया बद्दलच्या धोरणामुळे गुगल कंपनीला मोठे पाठबळ मिळाले आहे. 

पंतप्रधान नरेंद्र मोदी यांच्याशी सुंदर पिचाई यांनी नुकताच संवाद साधला. भारतीय उद्योग व शेतीला तंत्रज्ञानाच्या माध्यमातून कसा फायदा करून देता येईल तसेच डेटा व सायबर सुरक्षेसाठी करावयाच्या उपाययोजना या गोष्टींवर दोघांनी चर्चा केली.