मुंबई पॅटर्न ; शहरातील रुग्णसंख्या आटोक्यात

मुंबई पॅटर्न ; शहरातील रुग्णसंख्या आटोक्यात

मुंबई, दादासाहेब येंधे : दिवसेंदिवस मुंबईसह राज्यात कोरोनाचा प्रसार वाढत चालला आहे. कोरोनाचा प्रसार कमी करण्यासाठी राज्य सरकारच्या आरोग्य यंत्रनेणेही कंबर कसली आहे. मात्र, असे असताना एक आनंदाची बातमी समोर येत आहे ती म्हणजे, मुंबईतील कोरोना प्रादुर्भाव आटोक्‍यात येत असल्याचे चित्र आहे. राज्याच्या नगरविकास विभागाच्या सचिव मनीषा म्हैसकर यांनी फेसबुक पोस्टद्वारे ही माहिती दिली आहे. राज्यात कोरोनाचा प्रादुर्भाव जरी वाढत असला तरी मुंबईत मात्र, कोरोनाचा आलेख घटत असल्याचे चित्र आहे. 

महापालिकेने केलेल्या विविध उपाययोजनांमुळे मुंबईतील कोरोनाचा आलेख झपाट्याने खाली येत असल्याची माहिती आहे. संपूर्ण मुंबईत रुग्ण वाढीचा वेग १.३९ टक्क्यांपर्यंत खाली आला असून, रुग्ण दुपटीचा कालावधी ५० दिवस इतका झाला आहे. वांद्रे परिसरात हा कालावधी तब्बल १४० दिवसांवर पोहोचला असून डोंगरी, कुर्ला, माटुंगा या भागात ७९ ते ९८ दिवसांपर्यंत वाढला आहे.
रुग्ण संख्या आटोक्यात येणे हा 'मुंबई पॅटर्न' असल्याचे म्हटले आहे. हा पॅटर्न आता देशभरात नावाजला जात असून यामागे पालिकेने राबवलेले 'चेस द व्हायरस' हे धोरण परिणामकारक ठरल्याचे त्यांनी फेसबुक वरील पोस्टमध्ये स्पष्ट केले आहे. हे यश विविध आघाड्यांवर लढणाऱ्या प्रत्येक मुंबई महापालिका कर्मचाऱ्यांचे असल्याचे म्हैसकर म्हणाल्या. म्हैसकर यांनी कोरोनाची लस येईपर्यंत मुंबईकरांनी न्यू नॉर्मल जीवनशैली आत्मसात करताना प्राप्त परिस्थिती सोबत जगण्यास सुरुवात करावी असे आवाहन केले आहे. 'न्यू नॉर्मल' म्हणजे काय तर कुठल्याही अत्यावश्यक कामाशिवाय बाहेर पडून कोरोनाला निमंत्रण देणे खरच गरजेचे आहे काय हा प्रश्न स्वतःला प्रत्येकाने विचारणे. हा संसर्ग टाळण्यासाठी बुफे जेवण करणे, जिममध्ये जाणे, मनोरंजन उद्यानात जाणे, चित्रपट किंवा बारमध्ये जाणे, गर्दी असलेल्या धार्मिक कार्यक्रमात उपस्थिती लावणे अशा सर्वाधिक धोका असलेल्या ठिकाणी या काळात न जाण्याचे आवाहन त्यांनी केले आहे.