मुंबई, दि. १६ : सोशल मीडिया वरून मैत्री करायची अन मैत्रीचे रूपांतर प्रेमात होताच लग्नाचे आमिष दाखवत व्हिडिओ कॉलवर अश्लील संवाद साधायचा. सावज जाळ्यात अडकताच पुढे त्याचा आक्षेपार्ह व्हिडिओ बनावट वेबसाईटवर अपलोड करून नंतर पैशांची मागणी करणाऱ्या आसामच्या विकृत मजनूला एमआयडीसी पोलिसांनी बेड्या ठोकल्या आहेत. दिलदार हुसेन युनोस अली (वय,२३) असे अटक केलेले आरोपीचे नाव असून त्याने अशा प्रकारे किती महिलांना फसवला याबाबत पोलीस आणखी तपास करत आहेत.
पोलिसांनी दिलेल्या माहितीनुसार तक्रारदार महिलेचे इंस्टाग्रामवर दिलदार खान याच्याशी ओळख झाली होती. आरोपीने महिलेशी मैत्री केली. मैत्रीचे रूपांतर प्रेमात होताच तिला लग्नाचे आमिष दाखवले. त्यानंतर खान याने व्हिडिओ कॉल करून महिलेलाही आक्षेपार्ह व्हिडिओ कॉल करण्यास भाग पाडले. खान याने या व्हिडिओ कॉलचे स्क्रीन रेकॉर्डिंग करून आक्षेपार्ह व्हिडिओ आणि फोटो फिर्यादी यांच्या नावाने फेक वेबसाईट बनवून त्यावर अपलोड केले होते.
याबाबत महिलेला समजताच त्यांना धक्काच बसला त्यांनी तात्काळ एमआयडीसी पोलीस ठाणे गाठून तक्रार दिली. त्यानुसार पोलिसांनी गुन्हा नोंदवत लगेचच तपास सुरू केला. आरोपीने गुन्हा दाखल झाल्यानंतरही महिलेला व्हिडिओ व्हायरल न करण्यासाठी पैशांची मागणी करण्यास सुरुवात केली होती.
गुन्ह्याचे गांभीर्य ओळखून गुन्ह्याच्या तपासासाठी वरिष्ठ पोलीस निरीक्षक सतीश गायकवाड यांच्या मार्गदर्शनाखाली तपास अधिकारी तुकाराम कोयंडे, सायबर अधिकारी पोऊनि प्रमोद कोतवाड, पोलीस अंमलदार गणेश नाईक, पोउनी खांगळ, पोलीस हवालदार काळे, पोलीस शिपाई भोसले तसेच तांत्रिक मदत पोलीस हवालदार पिसाळ यांचे विशेष पथक तयार करण्यात आले होते.
या गुन्ह्याच्या तांत्रिक तपासावरून आरोपी आसामच्या दुर्गम भागात राहत असल्याची माहिती मिळाली त्यानुसार पोलीस उपनिरीक्षक खांगळ आणि त्यांच्या पथकाला आसाम येथे रवाना करण्यात आले होते. पोलिसांनी आरोपीला तेथून बेड्या ठोकल्या आहेत.
0 टिप्पण्या