मुंबई : मुंबईतील एक ७५ वर्षीय निवृत्त जहाजाचा कॅप्टन शेअर बाजारातील गुंतवणुकीवर भरघोस परतावा देण्याचे खोटे आश्वासन देणाऱ्या सायबर फसवणुकीला बळी पडला असून, यावर्षी ऑगस्ट ते नोव्हेंबर दरम्यान तब्बल ११.१६ कोटी रुपयांचे नुकसान झाले आहे, असे पोलिसांनी सांगितले.
सायबर फसवणूक प्रकरणी पोलिसांनी कैफ इब्राहिम मन्सुरी याला अटक केली असून त्याच्याकडे वेगवेगळ्या बँकांचे ३३ डेबिट कार्ड आणि १२ चेकबुक सापडले, असे पोलिसांनी सांगितले. शेअर बाजारातील गुंतवणुकीत प्रचंड रस असलेल्या पीडितेला फसवणूक करणाऱ्यांनी स्टॉकमधील गुंतवणुकीवर भरघोस परतावा देण्याचे आमिष दाखवले.
सुरुवातीला, तक्रातदार यांच्या ऑनलाइन गुंतवणूक खात्यात नफा झालेला त्यांना दिसून आला. पण, जेव्हा त्यांनी आपल्याला झालेला नफा काढण्याचा प्रयत्न केला तेव्हा त्याला २० टक्के सेवाकर शुल्क भरण्यास सांगण्यात आले. आपली फसवणूक झाल्याचे लक्षात येताच तक्रारदार यांनी दक्षिण सायबर पोलीस ठाण्यात तक्रार दाखल केली, असे पोलिसांनी सांगितले. यावर्षी ऑगस्ट ते नोव्हेंबर दरम्यान पीडितेची तब्बल ११.१६ कोटी रुपयांची फसवणूक झाली असे पोलिसांनी सांगितले.
तपासादरम्यान, पोलिसांनी उलगडा केला की फसवणूक करणाऱ्यांनी अनेक बँक खात्यांचा वापर करून निधी काढून घेतला. या खात्यांमध्ये पैसे ट्रान्सफर करून पीडितेने २२ व्यवहार केले होते. दोन खात्यांचा मागोवा घेतल्यावर, केवायसी पडताळणीसाठी पॅनकार्ड प्रदान केलेल्या महिलेने चेकद्वारे ६ लाख रुपये काढल्याचे पोलिसांना आढळले.
या महिलेकडे चौकशी केली असता तिने कैफ इब्राहिम मन्सुरी याच्या सांगण्यावरून पैसे काढल्याचे कबूल केले. पोलिसांनी मन्सुरी यास दक्षिण मुंबईत अटक केली आणि त्याच्याकडे १२ वेगवेगळ्या बँक खात्यांशी जोडलेली ३३ डेबिट कार्ड सापडली, ज्याचा वापर पीडितेच्या निधीतून ४४ लाख रुपये हस्तांतरित करण्यासाठी केला गेला होता.
0 टिप्पण्या