मुंबई, दादासाहेब येंधे : एका महिलेने दोन लाख रुपयांसाठी तीन वर्षांच्या मुलाचे अपहरण केल्याची घटना सोमवारी वडाळा परिसरात घडली. याप्रकरणी वडाळा पोलिसांनी आरोपी महिला आणि तिच्या दोन साथीदारांना अटक केली.
वडाळा परिसरात राहत असलेले सुमन चौरसिया यांचा तीन वर्षांचा मुलगा सोमवारी दुपारी घराबाहेर खेळत असताना तो अचानक गायब झाला. याबाबत चौरसिया यांनी वडाळा पोलीस ठाण्यात जाऊन रीतसर तक्रार दाखल केली. पोलिसांनी याप्रकरणी तत्काळ गुन्हा दाखल करून तपासाची चक्रे फिरविण्यास सुरुवात केली. यावेळी पोलिसांनी परिसरातील सीसीटीव्ही कॅमेऱ्यातील व्हिडिओ ची तपासणी केली. याच परिसरात वास्तव्यास असलेली सानिका वाघमारे (१८) या मुलाला घेऊन जात असल्याचे सीसीटीव्ही कॅमेऱ्यातील चित्रणात दिसले. त्यानुसार पोलिसांनी सानिकाचा शोध सुरू केला.
काही वेळातच दोन इसम अपहरण झालेल्या मुलाला घेऊन वडाळा पोलीस ठाण्यात आले. आरोपी महिलेनेच या मुलाला पोलीस ठाण्यात घेऊन जाण्यास त्यांना सांगितले होते. पोलिसांनी मुलाला ताब्यात घेतले आणि त्याला त्याच्या आईच्या स्वाधीन केले. त्यानंतर आरोपी तरुणीला अटक करून तिची चौकशी करण्यात आली. पवन पोखरकर (२०) याने या मुलाचे अपहरण करण्यास सांगितल्याचे सानिकाने कबुल केले. यासाठी पवन तिला दोन लाख रुपये देणार होता. सानिकाच्या कबुलीजबाबानंतर पोलिसांनी पवन आणि त्याचा साथिदार सार्थक बोंबले या दोघांच्या देखील मुसक्या आवळल्या.
0 टिप्पण्या