०५/१०/२०२३
मुंबई, दादासाहेब येंधे : अनधिकृत नर्सिंग होमच्या माध्यमातून बालकांची विक्री करणाऱ्या बोगस डॉक्टर व एजंटसह पाच महिलांच्या टोळीला ट्रॉम्बे पोलिसांनी अटक केली आहे. धक्कादायक गोष्ट म्हणजे याच प्रकरणात अटक करण्यात आलेल्या ज्युलिया फर्नांडिस विरोधातील हा सातवा गुन्हा आहे. नर्सिंग होममध्ये येणाऱ्या गरीब व गरजू महिलांना हेरले जायचे. पैशांचे आमिष देत त्यांच्या नवजात बालकांची ७ ते १० लाखांत विक्री केली जात असल्याची धक्कादायक माहिती पोलिसांच्या कारवाईतून समोर आली आहे.
शिवाजीनगर भागात बाळांची विक्री होत असल्याची माहिती ट्रॉम्बे पोलीस ठाण्याचे प्रकटीकरण पथकाचे पोलीस उपनिरीक्षक शरद नाणेकर यांना मिळाली. माहितीच्या आधारे पोलीस उपायुक्त हेमराजसिंह राजपूत, वरिष्ठ पोलीस निरीक्षक रवींद्र रणशेवरे यांच्या मार्गदर्शनाखाली नानेकर यांच्या पथकाने तपास करत दोन महिलांना नवजात बालकांसह ताब्यात घेतले आहे. त्यांच्याविरुद्ध गुन्हा नोंदवत पुढील तपास सुरू केला.
तपासात नर्सिंग होमचे कनेक्शन उघडकीस येताच शिवाजीनगर येथील रेहमानी नर्सिंग होमच्या मदतीने या रॅकेटची मास्टरमाईंड ज्युलिया लॉरेन्स फर्नांडिस ही रॅकेट चालवत असल्याचे निष्पन्न झाले. त्यानुसार बोगस डॉक्टर सायराबानू शेख, दलाल गोरीबी उस्मान शेख, शबाना झाकीर शेख, गुलाबशा मतीन शेख या पाच जणींना बेडया ठोकण्यात आल्या आहेत. त्यांच्याकडून दोन नवजात बालकांनाही ताब्यात घेतली आहे. त्यांनी या बाळाची ५ लाखांत विक्री केल्याचे समोर आले आहे.
शिवाजीनगर येथील एका छोट्याशा क्लिनिकला नर्सिंग होम बनवत गेल्या वर्षभरापासून रुग्णांच्या जीवाशी खेळ सुरू होता. सायराबानो ही दहावी पास असून तिने रेडिओलॉजीचे शिक्षण घेतले आहे. गेल्या वर्षभरात जवळपास ५२ प्रसूती या नर्सिंग होम मध्ये झाल्या. तपासात हे नर्सिंग होम देखील अनधिकृतपणे थाटल्याचे स्पष्ट झाले आहे.
फर्नांडिस ही बोगस डॉक्टर सायराबानो तसेच दलाल महिलांच्या मदतीने गरीब गरजू तसेच नवऱ्याने टाकलेल्या महिलांचा शोध घ्यायची. त्यांना डिलिव्हरीचा खर्च तसेच पुढे बाळाच्या बदल्यात पैशांचे आमिष दाखवून जाळ्यात ओढायची. प्रसुती पर्यंत महिलांची देखभाल करायची. प्रसूतीनंतर बाळाच्या शोधात असलेल्या दांपत्यांना त्यांची विक्री करत होती.
2202
कोणत्याही टिप्पण्‍या नाहीत:
टिप्पणी पोस्ट करा