भाडेकरूची माहिती द्या

 मुंबई पोलिसांचा आदेश, अन्यथा कारवाई

मुंबई, दि. ३१ : आपले घर किंवा दुकान कोणाला भाड्याने दिल्यास त्याची माहिती पोलिसांना देणे बंधनकारक असूनही मुंबईकर त्याकडे कानाडोळा करीत असल्याचे निदर्शनास आले आहे. त्यामुळे पुन्हा एकदा आदेश जारी करीत मुंबई पोलिसांनी भाडेकरांची माहिती देण्यास सांगितले आहे. दहशतवादी समाजकंटकांकडून विशेषता परदेशी नागरिकांकडून आश्रयस्थानाचा दुरुपयोग होण्याची भीती असल्याने ही सक्ती करण्यात आली आहे. भाडेकरूंची माहिती न दिल्याचे आढळल्यास कारवाई करण्याचा इशाराही पोलिसांनी दिला आहे.

मुंबईतील आपल्या मालकीचे घर, दुकान, व्यावसायिक गाळा कोणालाही भाडेतत्त्वावर देताना पोलिसांना त्या संदर्भात माहिती देणे बंधनकारक आहे. मुंबई पोलिसांच्या वेबसाईटवर जाऊन आपल्या भाडेकरूंची आणि स्वतःची माहिती सहज भरता येऊ शकते असे असूनही मुंबईकर टाळाटाळ करीत असल्याचे पोलिसांच्या निदर्शनास आले. या आधीच्या अनेक घटनांमध्ये आरोपी भाड्याने राहत असल्याचे तपासातून समोर आले आहे. त्यामुळे भाडेकरूंची माहिती पोलिसांना न दिल्यास त्याचा गैरफायदा समाजकंटक, दहशतवादी घेण्याची दाट शक्यता आहे. आपल्या दुर्लक्षामुळे एखादी मोठी दुर्घटना होऊ नये याची सावधगिरी म्हणून सर्वांनी भाडेकरुंची माहिती त्वरित द्यावी असे आदेश मुंबई पोलिसांनी जाहीर केले आहेत.

मुंबई पोलिसांच्या वेबसाईट वरील सिटीजन पोर्टलवरून भाडेकरुंची  माहिती ऑनलाईन अपलोड करण्याच्या सुविधा आहेत. ज्या व्यक्तीला घर, दुकान भाड्याने देण्यात आले आहे त्याचा सविस्तर तपशील येथे भरायचा आहे. व्यक्ती परदेशी असल्या त्याचे नाव, राष्ट्रीयत्व, याचबरोबर पासपोर्ट क्रमांक, जारी केल्याचे ठिकाण, वैधता तसेच व्हिसा क्रमांक, श्रेणी आणि मुदत अशी माहिती भरावी असे आदेशांत नमूद करण्यात आले आहे. पोलिसांच्या या आदेशाचे उल्लंघन केल्यास सदर घर मालकावर भादंवी १८६० च्या कलम १८८ अंतर्गत कारवाई केली जाईल असे पोलिसांनी आदेशात म्हटले आहे.