होळी, रंगपंचमी सण साधेपणाने साजरे करा
मुंबई : या वर्षी दि. १७ मार्च रोजी होळी, १८ मार्च रोजी धुलिवंदन व २२ मार्च, २०२२ रोजी रंगपंचमी हे सण साजरे करण्यात येणार आहेत. कोविड- १९ मुळे गेल्या दोन वर्षांपासून सर्व धर्मिय सण, उत्सव तसेच विविध कार्यक्रम नागरिकांनी मोठ्या प्रमाणात एकत्र न येता, हक्यतोवर घरातच राहून साजरे केले आहेत. कोरोनाचे संक्रमण अद्याप सुरु असल्यामुळे होळी, धुलिवंदन व रंगपंचमी उत्सव नागरिकांनी मोठ्या प्रमाणात एकत्र येऊन अथवा गर्दी करुन साजरे न करता स्वत:च्या व इतरांच्या आरोग्याच्या दृष्टीकोनातून काळजी घेऊन साजरे करणे आवश्यक आहे. त्या अनुषंगाने खालील मार्गदर्शक सूचना देण्यात येत आहेत:-
१) महाराष्ट्र शासन महसूल व वन, आपत्ती व्यवस्थापन, मदत व पुनर्वसन विभागाचे परिपत्रक क्र.-
०५/२०२०/७३.९२/०७५-१, दि. १ मार्च, २०२२ अन्वये दिलेल्या सूचनांचे काटेकोर पालन करावे. होळी/शिमगा हा सण संपूर्ण महाराष्ट्रात मोठ्या उत्साहात साजरा केला जातो. यावर्षी दि. १७ मार्च, २०२२ रोजी होळीचा सण आहे. कोविड संक्रमणामुळे हा सण शक्यतोवर गर्दी न करता कोविड अनुरुप वर्तणूक नियमांचे पालन करुन साजरा करावा.
२) दि. १८/३/२०२२ रोजी धुलिवंदन व २२/३/२०२२ रोजी रंगपंचमी हे सण साजरे करण्यात येणार आहेत. या सणानिमीत्ताने एकमेकांवर रंग टाकणे, पाणी टाकणे, एकमेकांना गुलाल लावून रंगाची उधळण करण्यात येत असते. परंतु कोविड- १९ चा प्रादुर्भाव वाढू नये यासाठी धुलिवंदन व रंगपंचमी हे सण साधेपणाने साजरे करावेत.
३) होळी/शिमगा सणा निमित्ताने (विशोष करुन कोकणात) पालखीची मिरवणूक काढण्यात येते. परंतू यावर्षी देखील पालखी घरोघरी न नेता स्थानिक मंदिरातच दर्शनाची व्यवस्था होईल याकरीता स्थानिक प्रशासनाने उपाययोजना कराव्यात. तसेच त्याठिकाणी गर्दी होणार नाही व कोविड अनुरुप नियमांचे तंतोतंत पालन होईल याकडे सर्वतोपरी लक्ष देऊन योग्य ती दक्षता घ्यावी.
४) कोविड- १९ चा प्रादुर्भाव रोखण्यासाठी शासनाच्या मदत व पुनर्वसन, आरोग्य, पर्यावरण, वैद्यकीय शिक्षण विभाग तसेच संबंधित महानगरपालिका, पोलीस प्रशासन, स्थानिक प्रशासन यांनी विहित केलेल्या नियमांचे काटेकोर पालन करावे. तसेच या परिपत्रकानंतर व प्रत्यक्ष सण सुरु होण्याच्या मधल्या कालावधीत अजून काही सूचना प्रसिध्द झाल्यास त्यांचे देखील अनुपालन करावे.
कोणत्याही टिप्पण्‍या नाहीत:
टिप्पणी पोस्ट करा