मुंबई : पोलीस अधिकारी, अंमलदार व त्यांचे नातेवाईक हे त्यांच्या खाजगी गाड्यांवर 'पोलीस' अशी पाटी लावतात तसेच पोलिसांचे चिन्ह असलेले स्टिकर लावून गाड्या चालवतात असे प्रकार तात्काळ बंद करून खासगी वाहनावर पोलीस अशी पाटी अथवा स्टीकर लावू नका. अन्यथा संबंधितांवर शिस्तभंगाची कारवाई करण्यात येईल असा इशारा देण्यात आला आहे.
बहुतेक पोलीस अधिकारी, अंमलदार व त्यांचे नातेवाईक त्यांच्या खासगी वाहनांवर पोलिस असे लाल रंगाची पाटी लावतात किंवा पोलिसांचे स्टिकर लावून गाड्या चालवत असल्याने त्याविरोधात अनेक तक्रारी वरिष्ठांकडे येत होत्या. याबाबत उच्च न्यायालयाने देखील नाराजी व्यक्त करून संबंधितांवर कारवाई करण्याचे आदेश दिले होते. सर्व नागरिकांना समान कायदा या तत्त्वानुसार पोलिसांनीच कायद्याचे उल्लंघन करणे पोलिसांची प्रतिमा मलीन करण्यासारखे आहे. पोलीस अशी पाटी लावलेली वाहने नाकाबंदी तसेच सुरक्षा तपासणी न होता सोडले जाण्याची दाट शक्यता असते. पोलीस पाटीचा वापर करून घातपात घडविला जाण्याची शक्यता नाकारता येऊ शकत नाही. त्या सर्व गोष्टींचा विचार केला असता ज्या अधिकारी, अंमलदार किंवा त्यांच्या नातेवाईकांनी खासगी वाहनांवर पोलीस अशी पाटी लावलेली असेल तर ती यापुढे लावू नये. तसेच जर कोणी गाडीवर पोलीस पाटी, पोलीस असे स्टिकर लावलेले सापडले तर संबंधित अधिकारी, अंमलदारावर शिस्तभंगाची कारवाई करावी असे आदेश सर्व प्रभारी पोलिस निरीक्षकांना देण्यात आले आहेत.
Cp order
कोणत्याही टिप्पण्‍या नाहीत:
टिप्पणी पोस्ट करा