‘कोविड चाचण्या’ आणि ‘कॉन्टॅक्ट ट्रेसिंग’ यांची
संख्या वाढविण्याचे निर्देश
युरोप – अमेरिकेतील तिस-या लाटेच्या पार्श्वभूमीवर बृहन्मुंबई मनपा प्रशासनाचे
निर्देश
युरोप – अमेरिकेसह इतर काही देशांमध्ये ‘कोविड – १९’ या साथरोगाच्या तिस-या लाटेच्या पार्श्वभूमीवर
बृहन्मुंबई महानगरपालिका क्षेत्रात देखील या तिस-या लाटेची शक्यता लक्षात घेऊन
आवश्यक ते नियोजन व तयारी करण्यात येत आहे. जेणेकरुन भविष्यात सदर परिस्थिती
उद्भवल्यास सदर आव्हानाचा अधिक प्रभावीपणे मुकाबला करणे शक्य होईल. याच अनुषंगाने
बृहन्मुंबई महानगरपालिका आयुक्त श्री. इक्बाल सिंह चहल यांच्या मार्गदर्शनात आणि
अतिरिक्त महानगरपालिका आयुक्त (पश्चिम उपनगरे) श्री. सुरेश काकाणी यांच्या
नेतृत्त्वात बृहन्मुंबई महानगरपालिका प्रशासनाद्वारे सर्वस्तरीय कार्यवाही व
नियोजन करण्यात येत आहे. यामध्ये प्रामुख्याने खाटांची उपलब्धतता वाढविणे, कोविड उपचार केंद्र व रुग्णालये इत्यादींची संख्या
वाढविण्यासह ते अधिक सुसज्ज करणे, कोविड
चाचण्यांची संख्या वाढविणे, प्रतिबंधित
क्षेत्रांची अधिक प्रभावी अंमलबजावणी करणे इत्यादी बाबींचा समावेश आहे.
वरीलबाबत
अधिक माहिती देताना अतिरिक्त महानगरपालिका आयुक्त (पश्चिम उपनगरे) श्री. सुरेश
काकाणी यांनी सांगितले की, बृहन्मुंबई
महानगरपालिकेच्या सर्व म्हणजे ७ परिमंडळांना आणि २४ विभाग कार्यालयांना सुस्पष्ट
निर्देश नुकतेच जारी करण्यात आले आहेत. या निर्देशांबाबत महत्त्वाची मुद्देनिहाय
माहिती पुढीलप्रमाणे आहेः-
१. कोविड
उपचार केंद्र १ व २ बाबत (सीसीसी - १ व २) : कोविड बाधित रुग्णांवर यथायोग्य
उपचार करण्याच्या दृष्टीने ‘कोविड – १९’ या
साथरोगाच्या पहिल्या व दुस-या लाटे दरम्यान बृहन्मुंबई महानगरपालिका
प्रशासनाद्वारे अनेक ठिकाणी ‘कोविड उपचार
केंद्र - १’ (COVID Care Centre - 1) आणि ‘कोविड उपचार केंद्र - २’ (COVID Care Centre - 2) उभारण्यात आली होती. यापैकी, ‘कोविड उपचार केंद्र - १’ मध्ये
लक्षणे नसलेल्या कोविड बाधित रुग्णांवर उपचार केले जात होते. तर काही प्रमाणात
लक्षणे असलेल्या (Mild Symtamatic) रुग्णांवर ‘कोविड उपचार केंद्र – २’ मध्ये वैद्यकीय उपचार क्रमानुसार उपचार केले जातात.
यानुसार पहिल्या व दुस-या लाटे दरम्यान ज्या ठिकाणी कोविड उपचार केंद्रे उभारण्यात
आली होती, त्या सर्व ठिकाणांचे निरिक्षण करुन
त्यांची यादी व संबंधीत तपशील अद्ययावत करण्यासह या ठिकाणी आवश्यक असणारे मनुष्यबळ
व आवश्यक असणा-या सेवा इत्यादी तपशिलाचीही नोंद घेण्याचे निर्देश देण्यात आले
आहेत.
२. कोविड
विषयक वैद्यकीय चाचणीबाबत : आता हळूहळू व टप्प्याटप्प्याने व्यवसाय विषयक आणि
अर्थकारण विषयक विविध बाबी पुन्हा सुरु होत आहेत. या पार्श्वभूमीवर प्रतिबंधात्मक
उपाययोजना म्हणून कोविड विषयक वैद्यकीय चाचण्यांची संख्या अधिकाधिक वाढविण्याचे
आदेश देण्यात आले आहेत. यामध्ये ‘आरटीपीसीआर’ चाचणी (RTPCR) व ‘रॅपिड ऍण्टीजेन’ चाचणी (RAT) या दोन्ही प्रकारच्या चाचण्यांचा समावेश आहे. या
अनुषंगाने बृहन्मुंबई महानगरपालिका क्षेत्रात सदर वैद्यकीय चाचणी सुविधा
देणा-यांकडे आवश्यक तेवढ्या प्रमाणातील ‘किट’ ची उपलब्धतता असल्याची खातरजमा करण्याचे आणि संभाव्य
आवश्यकता लक्षात घेऊन योग्य ते नियोजन व कार्यवाही करण्यात येत आहे.
३. कॉन्टॅक्ट
ट्रेसिंग : कोविड या साथरोगाच्या प्रसारास अटकाव व्हावा, या उद्देशाने कोविड बाधित रुग्णांच्या निकटच्या संपर्कात
आलेल्या व्यक्तिंचे कॉन्टॅक्ट ट्रेसिंग केले जाते. या अनुषंगाने प्रत्येक बाधित
रुग्णामागे १५ व्यक्तिंचे कॉन्टॅक्ट ट्रेसिंग करण्यात येत होते. हे प्रमाण वाढवून
आता प्रत्येक रुग्णामागे २० व्यक्तिंचे कॉन्टॅक्ट ट्रेसिंग करण्यात येणार आहे.
४. प्रतिबंधित
क्षेत्र आणि बाधित रुग्णांचा पाठपुरावा : प्रतिबंधित क्षेत्रांमधील बाधित
रुग्ण आणि संशयित रुग्ण यांच्या स्तरावर अधिकाधिक प्रभावी व सातत्यपूर्ण पाठपुरावा
नियमितपणे करण्याच आदेश देण्यात आले आहेत.
५. विभागस्तरीय
नियंत्रण कक्षांचा आढावा व प्रशिक्षण : कोविड विषयक व्यवस्थापन अधिक प्रभावी व
अधिक सुयोग्यप्रकारे करण्यासाठी बृहन्मुंबई महानगरपालिकेच्या सर्व २४ विभागांमध्ये
विभागस्तरीय नियंत्रण कक्ष (Ward War
Room) कार्यरत
आहेत. तिस-या लाटेच्या पार्श्वभूमीवर या नियंत्रण कक्षांचा आढावा घेण्यात येत आहे.
त्याचबरोबर संभाव्य तिस-या लाटेदरम्यान लहान मुलांना संसर्ग होण्याची शक्यता लक्षात
घेऊन या अनुषंगाने आवश्यक ते प्रशिक्षण देखील नियंत्रण कक्षांमध्ये कार्यरत
असणा-यांना देण्यात येणार आहे.
६. जम्बो
कोविड रुग्णालये व कोविड उपचार केंद्रांबाबत : बृहन्मुंबई महानगरपालिकेने
अल्पावधीत कार्यान्वित केलेली जम्बो कोविड रुग्णालये आणि कोविड उपचार केंद्र
इत्यादी ठिकाणी असणा-या सोयी-सुविधा, वैद्यकीयदृष्ट्या
आवश्यक असणा-या बाबींचा पुरवठा, साफसफाई व
स्वच्छता विषयक सेवा, खानपान सेवा
इत्यादींबाबत देखील आढावा घेण्यात येत आहे.
७. कोविड
प्रतिबंधात्मक नियमांचे परिपूर्ण पालन : कोविड प्रतिबंधासाठी आवश्यक असणा-या ३
नियमांचे पालन नागरिकांनी अधिकाधिक प्रभावीपणे करावे, यासाठी जनजागृतीपर कार्यवाही अधिक प्रभावी करण्यासह
दंडात्मक कारवाई देखील अधिक काटेकोरपणे करण्यात येत आहे. सदर ३ नियमांमध्ये
सार्वजनिक ठिकाण मुखपट्टी वापरणे, २
व्यक्तिंमध्ये सुरक्षित अंतर असणे, वारंवार
साबणाने स्वच्छ हात धुणे या बाबींचा प्रामुख्याने समावेश आहे. त्याचबरोबर
सार्वजनिक ठिकाणी थुंकणा-यांवर करण्यात येणारी दंडात्मक कारवाई अधिक तीव्र
करण्याचे निर्देश देखील देण्यात आले आहेत.
अतिरिक्त माहिती
बृहन्मुंबई
महानगरपालिका क्षेत्रात सध्या वरळी परिसरातील एनएससीआय मध्ये उभारण्यात आलेले
जम्बो कोविड रुग्णालय, वांद्रे-कुर्ला
संकुल परिसरातील जम्बो कोविड रुग्णालय, गोरेगांव
परिसरातील नेस्को येथील जम्बो कोविड रुग्णालय, बृहन्मुंबई
महानगरपालिकेचे सेव्हन हिल्स रुग्णालय, भायखळा व मुलुंड
येथे रिचर्डसन ऍण्ड क्रुडास कंपनीच्या जागेत उभारण्यात आलेले रुग्णालय, दहिसर जम्बो कोविड रुग्णालय, कांजुरमार्ग येथील कोविड उपचार केंद्र आणि बृहन्मुंबई
महानगरपालिकेच्या अखत्यारितील विविध रुग्णालयांसह शासकीय व खासगी रुग्णालयांमध्ये
कोविड बाधित रुग्णांवर उपचार करण्याची सुविधा उपलब्ध आहे.
बृहन्मुंबई
महानगरपालिका क्षेत्रातील विविध रुग्णालयांमध्ये जुलै अखेरीस उपलब्ध आकडेवारीनुसार
३० हजार ३६४ रुग्णशय्या (बेड) उपलब्ध आहेत. यामध्ये १७ हजार ६९७ ऑक्सिजन
रुग्णशय्या, ३ हजार ७८८ अतिदक्षता रुग्णशय्या, लहान मुलांसाठी १ हजार ४६० रुग्णशय्या, लहान मुलांसाठीच्या अतिदक्षता कक्षात २३० रुग्णशय्या आणि
नवजात बालकांसाठीच्या अतिदक्षात कक्षात (NICU) ५३
रुग्णशय्या उपलब्ध आहेत.
(जसंवि / २७३)
कोणत्याही टिप्पण्‍या नाहीत:
टिप्पणी पोस्ट करा