मुंबई, (दादासाहेब येंधे) : आमच्या शेठला मुलगा झाला आहे, असे सांगून ज्येष्ठ नागरिकांना पैसे, साडी, कपडे देण्याचा बहाणा करून अंगावरील सोन्याचे दागिने लंपास करणाऱ्या दोन आरोपींना अटक करण्यात खार पोलिसांना यश आले आहे.
अर्जुन काळे (२४) आणि बालाजी पवार (२०) अशी आरोपींची नावे असून ते मूळचे परभणीतील रहिवासी आहेत. तब्बल ३५० ते ४०० सीसीटीव्ही फुटेज तपासून या गुंडांच्या मुसक्या आवळण्यात पोलीसांना यश आले आहे.
खार पोलिसांच्या हद्दीत राहणाऱ्या सलमा कुरेशी २७ नोव्हेंबर रोजी मासे खरेदी करण्यासाठी बाजारात गेल्या असता त्यांच्याजवळ एक अनोळखी व्यक्ती आला आणि त्याने 'आमच्या शेठला मुलगा झाला आहे असे सांगत तो वृद्धांना साडी आणि पैसे वाटतो आहे, ते घेण्यासाठी माझ्याबरोबर चला,' असे हिंदीमध्ये सांगितले. एका गाडीमागे बसवून सलमा यांना 'तुम्ही तुमच्या अंगावरील दागिने पर्समध्ये ठेवा. कारण ते दागिने पाहिले तर शेठ तुम्हाला पैसे देणार नाही,' असे त्याने सलमा यांस सांगितले. त्यानुसार सलमा यांनी सोन्याची चेन, कर्णफुले व साखळी असे जवळपास १ लाख ३१ हजार रुपयांचे दागिने स्वतःच्या पर्समध्ये काढून ठेवले. त्यानंतर त्या महिलेकडील पर्स आरोपींनी हातचलाखीने चोरत तेथून त्यांनी पळ काढला.
खार पोलिसांनी अटक केलेल्या आरोपींवर खार, वांद्रे, सायन, कुरार, दहिसर, दादर, वागळे इस्टेट, दिंडोशी, डोंगरी, मुंब्रा, कल्याण, वाकोला, एन. एम. जोशी, भिवंडी, हडपसर, मुलुंड, चतुःशृंगी आणि सिंहगड या पोलिस ठाण्यांमध्ये वेगवेगळे गुन्हे दाखल आहेत. ज्यात त्यांनी वृद्ध महिला, पुरुष यांना टार्गेट केल्याचे तपासात उघड झाले आहे.
खार पोलिस ठाण्याचे वरिष्ठ पोलिस निरीक्षक संजीव धुमाळ आणि निरीक्षक (गुन्हे) वैभव काटकर यांच्या मार्गदर्शनाखाली सहायक पोलिस निरीक्षक दत्ता कोकणे, सहायक फौजदार मनोज वैद्य, अंमलदार आनंद निकम, शिपाई, संजय सानप, अजित जाधव, महेश लहामगे, मारुती गळवे आणि अभिजीत कदम यांनी घटनास्थळावरील तब्बल ३५० ते ४०० कॅमेरे चेक केले. यामध्ये आरोपींनी वारंवार जाण्याचे रस्ते, अनेकदा कपडे व रिक्षा बदलल्याचे आढळून आले. हे आरोपी पोलिसांना खार, बांद्रा, सांताक्रुझ, परिसरात येणार असल्याची गुप्त माहिती मिळाली. तेव्हा येथे सापळा रचून दोघांचा मुसक्या आवळण्यात पोलीसांना यश आले.
कोणत्याही टिप्पण्‍या नाहीत:
टिप्पणी पोस्ट करा