चार जणांच्या तीन कोटींच्या मालमत्ता जप्त
मुंबई, दि. ४ : तरुण पिढीला नशेच्या आहारी ढकलणाऱ्या ड्रग्सच्या व्यवहारातून कोट्यावधी रुपयांची माया जमावणाऱ्या चौघांच्या मालमत्तेवर पोलिसांनी नुकतीच जप्ती आणली आहे. या चार तस्करांनी मुंबई, नवी मुंबई, ठाणे, नाशिक या ठिकाणी बंगले, रो हाऊस खरेदी केल्याचे कारवाईतून उघडकीस आले आहे.
ड्रग्स विक्री करून तस्करांनी कोट्यवधी रुपयांचे साम्राज्य उभे केल्याचे गुन्हे शाखेच्या कारवाईतून समोर आले आहे. गुन्हे शाखेच्या कक्ष-६ ने १६ ऑगस्ट रोजी अंमली पदार्थ विक्री करणाऱ्या टोळी विरुद्ध कायदेशीर कारवाई करत एमडी आणि चरस साठा जप्त केला होता. या गुन्ह्यात आतापर्यंत १२ आरोपींना अटक झाली आहे. साहिल खान उर्फ मस्सा, मोहम्मद शेख, शमशुद्दीन शहा, इमरान पठाण, मोहम्मद मंसूरी, मोहम्मद सिद्दिकी, सर्फराज खान, रईस कुरेशी, प्रियंका कारकौर, कायनाद खान, सईद शेख आणि अली मिर्झा अशी अटक केलेल्या आरोपींची नावे आहेत.
ड्रग्स तस्करीवर आळा घालण्यासाठी गुन्हे शाखेने कठोर पावले उचलण्यास सुरुवात केली आहे. पोलीस उपायुक्त राजतिलक रौशन यांच्या मार्गदर्शनाखाली कक्ष-६ चे प्रभारी पोलीस निरीक्षक रवींद्र साळुंखे, तपास अधिकारी हनुमंत ननावरे आणि अंमलदार यांनी ही कारवाई केली आहे.
यांच्याकडे सापडली मालमत्ता
साहिल मस्सा - याच्याकडे मालेगाव नाशिक येथील एक फार्म हाऊस शिळफाटा येथील फ्लॅट, घनसोली येथील रो हाऊस ५१ ग्राम सोने आणि ३५,०००/- ची रोकड सापडली आहे.
कायनात खान - घनसोली येथे रो हाऊस शिळफाटा येथे घर असल्याचे मिळून आले आहे.
सर्फराज खान - याच्याकडे मुंब्रा येथे एक फ्लॅट आणि एक कार अशी मालमत्ता आहे.
प्रियंका कारकौर - प्रियंकाच्या घरातून २७ लाखांची रोकड जप्त करण्यात आली आहे.
२२८८
0 टिप्पण्या