मुंबई, दि. ११ : बांगलादेशी नागरिकांकडून पैसे घेत त्यांना भारतात अवैधरित्या प्रवेश मिळवून देत वेगवेगळ्या ठिकाणी काम धंद्याला लावणाऱ्या एजंटचा गाशा गुंडाळण्यात पोलिसांना शनिवारी यश मिळाले आहे. त्याचे नाव अक्रम नूरनबी शेख (वय, २६) असे असून गुन्हे शाखेच्या कक्ष-६ ने शिवडी रेल्वे स्थानकावरून त्याच्या मुसक्या आवळत त्याच्या महिला साथीदारालाही अटक केली आहे.
भारतात घुसखोरी करून वास्तव्य करणाऱ्या बांगलादेशी व इतर परदेशी नागरिकांविरुद्ध कारवाईसाठी मुंबई गुन्हे शाखेकडून प्रयत्न सुरू असतात. कक्ष-६ कार्यालयाकडून त्यांच्याबाबतची माहिती संकलित करण्याचे काम सुरू होते. यादरम्यान ७ डिसेंबर रोजी बांगलादेशी नागरिकांना भारतात येण्यासाठी मदत करणारा एजंट शिवडी स्थानकाबाहेर आल्याची माहिती प्रभारी निधीक्षक रवींद्र साळुंखे यांना मिळाली.
त्यानुसार त्यांच्या पथकाने सदर ठिकाणी सापळा रचला आणि शेख याला ताब्यात घेतले. त्याच्या सखोल चौकशीमध्ये तो स्वतः मूळ बांगलादेशी नागरिक असून भारत-बांगलादेश सीमा कोणत्याही कायदेशीर परवानगी न घेता अवैधरित्या पार करून आल्याची त्याने कबूली दिली.
याप्रकरणी त्याच्या विरोधात ए के मार्ग पोलीस ठाण्यात गुन्हा दाखल करण्यात येऊन त्याला अटक करण्यात आली आहे. त्याची कसून चौकशी केल्यावर त्याची एक महिला साथीदार लीमा शहाजान अलदर (वय, २६) हिलादेखील गजाआड करण्यात आले असून त्या दोघांनाही न्यायालयाने १२ डिसेंबर पर्यंत पोलीस कोठडी सुनावली आहे.
0 टिप्पण्या