मनपा आयुक्तांच्या मार्गदर्शनात कोविड व आरोग्य विषयक आढावा बैठक संपन्न

महापालिका आयुक्त श्री. इकबाल सिंह चहल यांच्या मार्गदर्शनात बृहन्मुंबई महानगरपालिका क्षेत्रातील कोविड व आरोग्य विषयक बाबींची आढावा बैठक आज आयोजित करण्यात आली होती. दूरदृश्य प्रणालीद्वारे आयोजित या बैठकीला अतिरिक्त महानगरपालिका आयुक्त (पूर्व उपनगरे) श्रीमती आश्विनी भिडे, अतिरिक्त महानगरपालिका आयुक्त (प्रकल्प) श्री. पी. वेलरासू, अतिरिक्त महानगरपालिका आयुक्त (शहर) डॉ. संजीव कुमार, अतिरिक्त महानगरपालिका आयुक्त (पश्चिम उपनगरे) श्री. सुरेश काकाणी यांच्यासह संबंधीत सह आयुक्त, उप आयुक्त, मुंबई पोलीस दलातील उप आयुक्त (अभियान / Operations) हे मान्यवर उपस्थित होते. त्याचबरोबर महापालिकेचे संबंधीत सहाय्यक आयुक्त, संबंधीत खाते प्रमुख, वरिष्ठ अधिकारी आणि महापालिकेच्या विविध रुग्णालयांचे अधिष्ठाता व संबंधीत तज्ज्ञ डॉक्टर देखील या बैठकीला उपस्थित होते.

बैठकी दरम्यान चर्चिले गेलेले प्रमुख मुद्दे व संबंधीत आदेश याबाबतची माहिती पुढीलप्रमाणे आहेत:

•           गेल्या काही दिवसात कोविड बाधित रुग्णांच्या संख्येत किंचित वाढ होत असल्याचे निदर्शनास येत आहे. यापूर्वीचे याबाबतचे अनुभव लक्षात घेता, कोविड प्रतिबंधात्मक उपाययोजनांबाबत आपण अत्यंत सजग व सतर्क राहून अंमलबजावणी करणे गरजेचे आहे. या अनुषंगाने या आधीपासूनच लागू असलेल्या नियमानुसार ज्या इमारतींमध्ये ५ किंवा ५ पेक्षा अधिक कोविड बाधित रुग्ण आढळून आल्यास अशी इमारत ‘सील’ करण्यात येते. या नियमाची अंमलबजावणी अधिक प्रभावीपणे व अधिक कठोरपणे करण्याचे निर्देश महापालिका आयुक्त श्री. इकबाल सिंह चहल यांनी आजच्या बैठकी दरम्यान दिले आहेत.

•           तिस-या लाटेची संभाव्यता लक्षात घेता खबरदारीची उपाययोजना म्हणून आणि कोविड या साथरोगाचा संसर्ग इतरांना होऊ नये, या उद्देशाने प्रतिबंधात्मक नियमांची अंमलबजावणी अत्यंत कठोरपणे व ठामपणे करण्यात येत आहेत. यामुळे संबंधीत इमारतींमधील नागरिकांची काही प्रमाणात गैरसोय होऊ शकते, याची नम्र जाणीव महानगरपालिका प्रशासनाला आहे. तथापि, कोविड प्रतिबंधाच्या दृष्टीने हे गरजेचे असून, यासाठी सर्व संबंधितांनी परिपूर्ण सहकार्य करावे, असे आवाहन देखील या अनुषंगाने मनपा प्रशासनाद्वारे करण्यात येत आहे.  

 •           वरीलनुसार बृहन्मुंबई महानगरपालिका क्षेत्रातील ज्या इमारती सील करण्यात येतील, अशा इमारतींमध्ये प्रवेश करण्यास कोणालाही अनुमती असणार नाही. तसेच  इमारतींमध्ये असणा-या कोणत्याही व्यक्तिला बाहेर पडण्यास मनाई असणार आहे. त्याचबरोबर अशा इमारतींमध्ये विविध कामांसाठी येणारे कामगार, वाहन चालक यांना देखील सदर कालावधी दरम्यान इमारतीमध्ये प्रवेश असणार नाही.

•           इमारत सील करण्याविषयीची प्रतिबंधात्मक उपाययोजना अधिक प्रभावीपणे राबविली जावी, यासाठी सर्व सील इमारतींच्या गेटवर पोलीस बंदोबस्त ठेवण्याचे निर्देश देखील महानगरपालिका आयुक्तांनी आजच्या बैठकी दरम्यान दिले आहेत. त्याचबरोबर महापालिकेच्या सार्वजनिक आरोग्य खात्याने देखील निर्धारित करण्यात आलेल्या कार्य पद्धतीनुसारच सील इमारती विषयक आवश्यक ती सर्व कार्यवाही वेळच्यावेळी करण्याचे निर्देश.

 •           कोविड प्रतिबंधाच्या दृष्टीने आवश्यक असणा-या ३ बाबींचे परिपूर्ण पालन सर्व ठिकाणी योग्यप्रकारे होत असल्याची खातरजमा व जनजागृती नियमितपणे करण्याचे निर्देश. यामध्ये योग्यप्रकारे मास्क परिधान करणे, सामाजिक अंतर राखणे आणि वारंवार योग्यप्रकारे साबणाने हात धुणे या बाबींचा समावेश आहे.

 •           बृहन्मुंबई महानगरपालिका क्षेत्रात अनेक ठिकाणी योग्यप्रकारे मास्क परिधान न करता नागरिक आढळून येत असल्याच्या तक्रारी प्राप्त होत आहेत. तसेच अनेक सार्वजनिक ठिकाणी सामाजिक अंतर राखले जात नसल्याच्या तक्रारी देखील प्राप्त होत आहेत. याबाबत योग्य ती खबरदारी न घेतल्यास पुन्हा एकदा आपल्याला निर्बंध अधिक कडक लागू शकतात. त्यामुळे नियमांच्या उल्‍लंघनाबाबत अधिक व्यापकतेने कारवाई करण्याचे निर्देश.   

 •           बृहन्मुंबई महानगरपालिका क्षेत्रात मास्क न लावणा-यांवर करण्यात येत असलेली दंडात्मक कारवाई अधिक तीव्र करण्याचे निर्देश महानगरपालिका आयुक्तांनी सर्व २४ प्रशासकीय विभागांना दिले. या अनुषंगाने आवश्यक तेवढ्या संख्येतील ‘क्लीन-अप मार्शल’ ची तात्पुरती नियुक्ती करण्याचे निर्देश. 

 •           त्याचबरोबर मुंबई पोलीसांद्वारे करण्यात येत असलेली 'विना मास्क' विषयक कारवाई देखील अधिक तीव्र करण्याच्या सूचना देखील आयुक्तांनी मुंबई पोलीस दलास दिल्या आहेत. या अनुषंगाने मनपा क्षेत्रात दररोज अधिकाधिक व्यक्तिंवर दंडात्मक कारवाई करणे गरजेचे असल्याची सूचना मनपा आयुक्तांनी सर्व संबंधितांना दिली.

 •           कोविडच्या तिस-या लाटेची शक्यता आणि डेल्टा प्रकारच्या कोविड विषाणूचा संभाव्य प्रादुर्भाव लक्षात घेऊन बृहन्मुंबई महानगरपालिकेची सर्व रुग्णालये आणि जम्बो कोविड रुग्णालये यांना सतर्क व सुसज्ज राहण्याचे निर्देश. या अंतर्गत प्रामुख्याने सर्व रुग्णालयांमधील आवश्यक त्या सर्व सोयी-सुविधा, जसे की, रुग्णखाटा, रुग्णवाहिका, रुग्णालयातील मनुष्यबळ, आवश्यक ती साधनसामुग्री, औषधोपचार विषयक बाबी, औषधे-गोळ्या-इंजेक्शन्स साठा इत्यादी सर्व बाबींचा आढावा घेऊन संभाव्य गरजेनुसार अद्ययावत करण्याचे निर्देश.

 •           बृहन्मुंबई महानगरपालिकेच्या ज्या रुग्णालयांमध्ये व जम्बो कोविड रुग्णालयांमध्ये ऑक्सिजन केंद्रे सुरु करण्यात आली आहेत, त्यांच्या क्षमतेची चाचणी घेण्याचे व रुग्णालयांमधील प्रत्येक ऑक्सिजन बेडपर्यंत ऑक्सिजन योग्यप्रकारे व योग्य प्रमाणात पोहोचत असल्याची खातरजमा करण्याचे निर्देश.

 •           कोविड बाधा झाल्याची चाचणी लवकरात लवकर होणे हे रुग्णाच्या दृष्टीने तसेच कोविड प्रतिबंधाच्या दृष्टीने आवश्यक आहे. ही बाब लक्षात घेऊन महापालिका क्षेत्रात २६६ कोविड चाचणी केंद्रे कार्यान्वित करण्यात आली आहेत. तरी ज्यांना कोविडची लक्षणे असतील, त्यांनी कोविड चाचणी केंद्रात जाऊन कोविड चाचणी करुन घ्यावी. तसेच सील इमारतींमधील व्यक्तिंची देखील टप्प्या-टप्प्याने कोविड चाचणी करण्याचे निर्देश. या अनुषंगाने आपल्या विभागातील कोविड चाचणी केंद्राची माहिती वॉर्ड वॉर रुमद्वारे उपलब्ध करुन देण्यात आली आहे. तरी संबंधीत नागरिकांनी आपल्या विभागाच्या वॉर्ड वॉर रुमशी संपर्क साधावा.      

 •           तिस-या लाटेची संभाव्यता लक्षात घेऊन महापालिकेच्या सर्व २४ विभागांमध्ये कार्यरत असणारे नियंत्रण कक्ष (वॉर्ड वॉर रुम) अद्ययावत करण्याचे निर्देश. या अंतर्गत प्रामुख्याने तेथील मनुष्यबळ, तांत्रिक सेवा-सुविधा इत्यादी बाबींचा आढावा घेऊन गरजेनुसार आवश्यक त्या सुधारणा करण्याचे निर्देश.

 •           महापालिकेच्या सर्व २४ विभागांमध्ये असणा-या सार्वजनिक शौचालयांचे दिवसातून ५ वेळा निर्जंतुकीकरण (सॅनिटायझेशन) करण्याचे निर्देश. तसेच याच पद्धतीने महापालिकेच्या सर्व रुग्णालयांमध्ये असणा-या शौचालयांचे देखील निर्जंतुकीकरण नियमितपणे करण्याचे निर्देश.

 •           बृहन्मुंबई महानगरपालिका क्षेत्रातील १८ वर्षे व अधिक वय असणा-या सुमारे ७४ टक्के नागरिकांचे एक लसीकरण झालेले आहे. ही निश्चितच एक सकारात्मक बाब असल्याचे नमूद करत, महापालिका आयुक्तांनी उर्वरित २६ टक्के नागरिकांचे लसीकरण व्हावे, या दृष्टीने सर्वस्तरीय प्रयत्न करण्याचे निर्देश सार्वजनिक आरोग्य खात्याला दिले. या अंतर्गत प्रामुख्याने स्थानिक नगरसेवकांच्या मार्गदर्शनात जनजागृती करण्याचे निर्देश. तसेच आवश्यकतेनुसार स्वयंसेवी संस्था, खासगी रुग्णालये इत्यादींचे सहकार्य घेण्याचे निर्देश.   

 •           कोविड व्यतिरिक्त हिवताप (मलेरिया), डेंग्यू या आजारांबाबत देखील सजग व सतर्क राहण्याचे निर्देश. या दृष्टीने आवश्यक त्या सर्व प्रतिबंधात्मक उपाययोजना अधिक व्यापकतेने राबविण्याचे महापालिकेच्या कीटकनाशक विभागाला निर्देश.

 

(जसंवि/३०६)