गिरगांव चौपाटीवर येणाऱया पर्यटकांसाठी पर्यावरणस्नेही असे फिरत्या वाहनावरील निर्वात प्रसाधनगृह

गिरगांव चौपाटीवर येणाऱया पर्यटकांसाठी पर्यावरणस्नेही असे फिरत्या वाहनावरील निर्वात प्रसाधनगृह
·        तब्बल ९० टक्के पाण्याची बचत करण्याची क्षमता
·        सौर ऊर्जेवर चालते निर्वात यंत्रणा
 

मुंबई, दादासाहेब येंधे : पर्यटकांचे आकर्षण असलेल्या स्वराज्य भूमी अर्थात गिरगांव चौपाटीवर येणाऱया नागरिकांसाठी बृहन्मुंबई महानगरपालिकेच्या वतीने फिरत्या वाहनावरील निर्वात प्रसाधनगृह (Vacuum Mobile Toilet) उपलब्ध करुन देण्यात आले आहे. तब्बल ९० टक्के पाणी बचत करण्याची क्षमता असलेल्या या प्रसाधन गृहातील निर्वात यंत्रणा सौर उर्जेवर चालते. संपूर्णपणे पर्यावरणस्नेही असे हे प्रसाधनगृह प्रायोगिक तत्त्वावर पुढील ६ महिने कार्यरत राहणार आहे.

स्वराज्य भूमी गिरगांव चौपाटीवर (दिनांक २४ ऑगस्ट २०२१) या सुविधेचे लोकार्पण करण्यात आले. यावेळी प्रभाग समिती अध्यक्ष श्रीमती मीनल पटेल, स्थानिक नगरसेविका श्रीमती अनुराधा पोतदार, उप आयुक्त (परिमंडळ  १) श्री. विजय बालमवार, डी विभागाचे सहायक आयुक्त श्री. प्रशांत गायकवाड तसेच सामाजिक कार्यकर्त्या व सिटीझन्स ऍक्शन नेटवर्क संस्थेच्या पदाधिकारी श्रीमती इंद्राणी मलकानी यांच्यासह विविध मान्यवर उपस्थित होते.

महिलांसाठी १ आणि पुरुषांसाठी १ असे एकूण २ शौचकुपे असलेले हे प्रसाधनगृह एका वाहनावर स्थित आहे. त्यामुळे आवश्यकतेनुसार हव्या त्या ठिकाणी नेऊन प्रसाधनगृह सुविधा पुरविता येते. प्रत्येक फ्लशमध्ये सुमारे सव्वा लीटर पाण्याचा उपयोग या शौचालयात होतो. त्यामुळे २०० लीटर पाण्याचा उपयोग करुन जवळपास १०० फ्लश करता येतात. सर्वसाधारण प्रसाधनगृहांमध्ये २०० लीटर पाण्यात २० फ्लश होतात. म्हणजेच प्रत्येक फ्लशमध्ये किमान १० लीटर पाणी वापरात येते. या हिशेबाने सदर निर्वात प्रसाधनगृहामध्ये तब्बल ९० टक्के पाण्याची बचत होते. या प्रसाधनगृहातील निर्वात यंत्रणा सौर उर्जेवर कार्यरत राहते. त्यामुळे ते पूर्णपणे पर्यावरणस्नेही आहे. मेसर्स व्हॅकमॅन सॅनिटेशन सोल्यूशन प्रा. लि. यांच्यावतीने महानगरपालिकेला सदर फिरते निर्वात प्रसाधनगृह पुढील ६ महिन्यांसाठी विनामूल्य तत्त्वावर पुरविण्यात आले आहे.

हे प्रसाधनगृह २४ x ७ उपलब्ध राहणार असून त्यासाठी २ वाहन चालक नेमले आहेत. सद्यस्थितीत सदर प्रसाधनगृह प्रायोगिक तत्त्वावर पर्यटकांना वापरासाठी विनामूल्य उपलब्ध आहे. चौपाटीवर देशभरातून आणि विदेशातून देखील पर्यटक येत असतात. त्यांच्यासाठी ही सुविधा महत्त्वाची ठरणार आहे.     

(जसंवि/२९८)