कोविड लसीकरण
पडताळणी व त्याआधारे रेल्वे पास देण्यास प्रारंभ
महापौर श्रीमती किशोरी पेडणेकर व
अतिरिक्त आयुक्त श्री. काकाणी यांनी केली पाहणी
मुंबई, दादासाहेब येंधे : मुंबईतील सर्वसामान्‍य नागरिकांना येत्‍या स्‍वातंत्र्य दिनी म्‍हणजेच
दिनांक १५ ऑगस्ट २०२१ पासून उपनगरीय रेल्वे प्रवास करण्‍यास मुभा देण्‍याची
घोषणा राज्‍याचे माननीय मुख्‍यमंत्री श्री. उद्धव ठाकरे यांनी केली आहे. यानुसार बुधवारी (दि. ११ ऑगस्ट २०२१) सकाळी ७ वाजल्‍यापासून मुंबई महानगरपालिका
क्षेत्रातील ५३ रेल्वे स्थानकांवर ३५८ मदत कक्ष सुरु करण्यात आले आहेत.
मुंबईच्या महापौर श्रीमती किशोरी किशोर पेडणेकर तसेच अतिरिक्त महानगरपालिका आयुक्त
(पश्चिम उपनगरे) श्री. सुरेश काकाणी यांनी प्रत्यक्ष रेल्वे स्थानकांवर भेटी देऊन
या प्रक्रियेची पाहणी केली. दुपारी ३ वाजेपर्यंत १८ हजाराहून अधिक नागरिकांची
पडताळणी पूर्ण झाली. तर याच अनुषंगाने आज दुपारपर्यंतच्या पहिल्या सत्रात रेल्वे
प्रशासनाद्वारे १७ हजार ७५८ मासिक पासांचे वितरण करण्यात आले आहे.
ज्‍या सर्वसामान्‍य नागरिकांना कोविड लशीचे दोन डोस घेतल्‍यानंतर १४ दिवस
पूर्ण झाले आहेत, त्‍यांचे लसीकरण अंतिम प्रमाणपत्र व
छायाचित्र असणारे ओळखपत्र पडताळण्यात येत आहे. या ऑफलाईन पडताळणीमध्‍ये पात्र
ठरलेल्‍यांना रेल्वेकडून मासिक पास दिला जात असून त्याआधारे उपनगरीय रेल्वे
प्रवासाची मुभा देण्यात आली आहे.
दिनांक ११ ऑगस्ट २०२१ सकाळी ७ वाजेपासून मुंबईतील ५३ रेल्वे
स्थानकांवर ही प्रक्रिया सुरु झाली आहे. मुंबईच्या महापौर श्रीमती किशोरी किशोर
पेडणेकर यांनी पश्चिम रेल्वे मार्गावरील प्रभादेवी रेल्वे स्‍थानक व नंतर दादर
रेल्वे स्‍थानक येथे नगरसेविका श्रीमती प्रि‍ती पाटणकर, उप आयुक्त (परिमंडळ - २) श्री. हर्षद काळे, रेल्वे
अधिकारी व पोलिस अधिकारी यांचे समवेत भेट देऊन पाहणी केली. तसेच दादर (पश्चिम)
रेल्वे स्‍थानकावरील मदत कक्षास देखील महापौरांनी तसेच अतिरिक्त महापालिका आयुक्त
(पश्चिम उपनगरे) श्री. सुरेश काकाणी यांनी देखील भेट दिली. यावेळी जी उत्‍तर
विभागाचे सहायक आयुक्त श्री. किरण दिघावकर हेही उपस्थित होते. महापौर श्रीमती
पेडणेकर यांनी कोविड लसीकरण प्रमाणपत्र व ओळखपत्र घेऊन आलेल्या सर्वसामान्‍य रेल्वे
प्रवाशांशी संवाद साधला. ऑफलाईन पडताळणी प्रक्रिया पार पाडताना येणारे रेल्वे
प्रवासी आणि मदत कक्षावरील कार्यरत कर्मचारी यांनी देखील कोविड संसर्गाचा
प्रादुर्भाव होणार नाही, या दृष्टीने काळजी घेण्याचा सल्ला
देखील महापौरांनी दिला.
दरम्यान, मुंबई महानगरपालिका
क्षेत्रात एकूण ५३ रेल्वे स्थानकांवर मिळून ३५८ मदत कक्ष कार्यान्वित झाले आहेत. दुपारी ३ वाजेपर्यंतच्या पहिल्या सत्रात या सर्व ५३ स्थानकांवर मिळून एकूण १८
हजार ३२४ रेल्वे प्रवाशांची पडताळणी पूर्ण करण्यात आली आहे. या पडताळणीनंतर
नागरिकांना मासिक पास देण्याच्या कार्यवाहीची सुरुवात देखील रेल्वे प्रशासनाद्वारे
करण्यात आली आहे. याबाबत रेल्वे प्रशासनाद्वारे देण्यात आलेल्या माहितीनुसार आज
दुपारपर्यंत पहिल्या सत्रात १७ हजार ७५८ मासिक पास देण्यात आले आहेत. यामध्ये मध्य
रेल्वेद्वारे १२ हजार ७७१, तर पश्चिम रेल्वेद्वारे देण्यात
आलेल्या ४ हजार ९८७ मासिक पासांचा समावेश आहे.
दररोज सकाळी ७ ते रात्री ११ वाजेपर्यंत सलग २ सत्रामध्‍ये मदत कक्ष कार्यरत
असणार आहेत. यामुळे विनाकारण गर्दी न करता नागरिकांनी आपल्‍या घराजवळील रेल्वे स्थानकांवर
पडताळणीकरिता जावे, असे आवाहन पुनःश्च महानगरपालिका
प्रशासनाच्या वतीने करण्यात येत आहे.
(जसंवि /२७४)
कोणत्याही टिप्पण्‍या नाहीत:
टिप्पणी पोस्ट करा