भंडारवाडा, गोलंजी व फॉसबेरी जलाशयातील पाणीपुरवठ्यावर झाला होता परिणाम
कोविड साथरोगाच्या पार्श्वभूमीवर विविध आव्हाने असूनही सुयोग्यरीत्या काम पूर्ण
बृहन्मुंबई महानगरपालिका क्षेत्रातील नागरिकांना विविध नागरी सेवा सुविधा अव्याहतपणे मिळाव्यात यासाठी बृहन्मुंबई महानगरपालिका सातत्याने व अविरतपणे कार्यरत असते. तर बृहन्मुंबई महानगरपालिकेचा जल अभियंता विभाग व जलकामे विभाग हा महानगरपालिका क्षेत्रातील नागरिकांना अव्याहतपणे पिण्याचे शुद्ध पाणी मिळावे यासाठी नियमितपणे कार्यरत असतो. शिवडी परिसरातील 'टनेल शाफ्ट' (गाडी अड्डा टनेल) येथे काही दिवसांपूर्वी पाण्याची मोठी गळती उद्भवली होती. कोविड साथरोगाच्या पार्श्वभूमीवर ही गळती दुरुस्त करणे हे एक आव्हानच होते. मात्र, जल अभियंता व जलकामे विभागाच्या चमुने युद्धस्तरावर कार्यवाही करून हे दुरुस्ती काम केवळ अडीच तासांच्या अल्पावधीत व योग्य प्रकारे नुकतेच पूर्ण केले आहे. विशेष म्हणजे कोणत्याही भागाचा पाणीपुरवठा बंद न करता हे काम कौशल्यपूर्ण पद्धतीने करण्यात आले आहे.
अतिरिक्त महानगरपालिका आयुक्त (प्रकल्प) श्री. पी. वेलरासू यांच्या मार्गदर्शनात आणि उप आयुक्त (विशेष अभियांत्रिकी) श्री. अजय राठोड यांच्या नेतृत्वाखाली सहाय्यक अभियंता (जलकामे) (तातडीचा दुरुस्ती विभाग) श्री. जीवन पाटील आणि त्यांच्या सहकारी पथकाने हे काम यशस्वीरित्या पार पाडले.
बृहन्मुंबई महानगरपालिका क्षेत्रातील विविध परिसरांना पाणीपुरवठा करणाऱ्या भंडारवाडा जलाशय, गोलंजी हिल जलाशय व फॉसबेरी जलाशय; या तीन जलाशयांना पाणीपुरवठा करणाऱया जलवाहिनीवरील 'टनेल शाफ्ट' मध्ये ही गळती उद्भवली असल्याने कोट्यवधी लीटर पाणी वाया जाण्याची शक्यता होती. ज्यामुळे पाणी पुरवठ्यावर परिणाम होण्याची शक्यता होती. मात्र, सकाळी ७ ते ९:३० या केवळ अडीच तासांच्या कालावधी दरम्यान, पाण्याचा दाब कमी असताना, योग्यप्रकारे हे काम पूर्ण करण्यात आले. या दुरुस्तीवेळी प्रति मिनिट २ हजार ९०० लीटर पाणी उपसा करण्याची क्षमता असणारे पंप वापरण्यात आले.
भविष्यात वाया जाणारे कोट्यवधी लीटर पाणी या दुरुस्तीमुळे वाचविण्यात महानगरपालिकेच्या संबंधित चमुला यश आले आहे. सोबतच, एफ/दक्षिण विभागातील विविध भागांचा तसेच भंडारवाडा हिल जलाशयाची पातळी वाढल्याने ‘इ’ व ‘बी’ विभागातील पाणीपुरवठा देखील उच्च दाबाने व सुरळीत होणार आहे.
(जसंवि/०६३)
0 टिप्पण्या