शेळीपालनाच्या नावाखाली ड्रग्जचा कारखाना मुंबई पोलिसांनी केला उद्धवस्त

मुंबई, (दादासाहेब येंधे) : रायगड जिल्ह्यातील कर्जत येथे भाड्याच्या बंगल्यातून चालवल्या जाणाऱ्या ड्रग्ज कारखाना मुंबई पोलिसांनी उद्धवस्त केला आहे. मुंबईतील आरसीएफ पोलिसांनी ही कारवाई केली असून या प्रकरणी सहा जणांना अटक करण्यात आली आहे. अटक करण्यात आलेले आरोपी शेळी आणि पोल्ट्री फार्मच्या नावाखाली लपूनछपून एमडी हे ड्रग्ज कारखाना चालवत होते अशी माहिती पोलिसांनी दिली आहे. याकारवाईदरम्यान २४.४७ कोटी रुपयांहून अधिक किमतीचे ड्रग्ज आणि कच्चा माल जप्त करण्यात आला आहे, अशी माहिती परिमंडळ-६ चे पोलीस उपायुक्त नवनाथ ढवळे यांनी दिली.

रेहान शेख, शिवा गुप्ता, राजन सुब्रमण्यम, शोनू पठाण, अर्कन मेमन अशी अटक करण्यात आलेल्या आरोपीची नावे आहेत. एकूण सात जणांना अटक करण्यात पोलिसांना यश आले आहे. पोलिसांनी दिलेल्या माहितीनुसार, आरोपी पूर्वी मुंबईतील डोंगरी येथे राहत होते आणि सद्या ते नेरुळ येथे स्थलांतरित झाले होते. त्यांनी कर्जतमधील सौली येथे एक बंगला दरमहा १ लाख या दराने भाड्याने घेतला होता. तो बंगला पशुपालनासाठी असल्याचा दावा करत होता. तथापि, त्या जागेचा वापर मोठ्या प्रमाणात एमडी ड्रग्ज तयार करण्यासाठी केला जात होता.

मार्च २०२५ मध्ये पोलिसांनी टोळीतील एका सदस्याला ४५ ग्रॅम एमडीसह अटक केली होती, दरम्यान चौकशीत मुंबई आणि नवी मुंबईतील आणखी चार विक्रेत्यांना अटक करण्यात आली, ज्यांच्याकडून ६.६ किलोग्रॅम ड्रग्ज जप्त करण्यात आले. पुढील चौकशीत कर्जत येथील ड्रग्ज फॅक्टरी अस्तित्वात असल्याचे उघड झाले. तातडीने कारवाई करत, परिमंडळ-६ च्या विशेष पथकाने सावली रिसॉर्ट बंगल्यावर छापा टाकला आणि त्याच्या उत्पादनात वापरल्या जाणाऱ्या रसायनांसह ५.५ किलो एमडी जप्त केले.

अधिकाऱ्यांनी सांगितले की, सदर जागेवरून जप्त केलेल्या १ कोटी रुपयांच्या कच्च्या मालातून १५० किलो एमडी मिळण्याची शक्यता आहे. ज्याची बेकायदेशीर बाजारपेठेत किंमत अंदाजे ३०० कोटी रुपये आहे. नवनाथ ढवळे यांनी सांगितले की, एमडी रासायनिक प्रक्रियेचा तीव्र वास लपविण्यासाठी आरोपींनी मालमत्तेवर शेळ्या आणि कोंबड्या पाळल्या होत्या तसेच संशय दूर करण्यासाठी प्राण्यांच्या कचऱ्याच्या वासाचा वापर केला होता. 

पोलिसांचा अंदाज आहे की, गेल्या तीन महिन्यांत, आरोपी दर आठवड्याला सुमारे २५ किलो एमडी बनवत होते. ही टोळी अटक टाळण्यासाठी, दर तीन महिन्यांनी ठिकाणे बदलत होती, कर्जत परिसरात नेहमीच वेगळे बंगले भाड्याने घेत होते. दोन प्रमुख सूत्रधार सध्या फरार आहेत. पोलिस त्यांचा कसून शोध घेत आहेत आणि टोळीचे संपूर्ण वितरण नेटवर्क, आर्थिक व्यवहार आणि मोठ्या ड्रग्ज सिंडिकेटशी संबंध आहे का याचा तपास सुरू आहे.