स्पीकरवर गाणी गप्पा मारल्यास पोलिसात होणार तक्रार
मुंबई, दि. ५ : बस किंवा रेल्वेमधून प्रवास करताना मोबाईलवर मोठ्या आवाजात बोलणारे, गाणी ऐकणारे किंवा व्हिडिओ पाहणाऱ्यांचा इतर प्रवाशांना नेहमीच त्रास होतो. आता किमान 'बेस्ट' बस मधून प्रवास करणाऱ्या मुंबईकरांची यातून सुटका होणार आहे असे वाटते.
बेस्ट ने मोबाईलवर मोठ्यात आवाजात गप्पा मारण्यास,, मोठ्या आवाजात गाणी ऐकण्यास मनाई केली आहे तसेच याबाबत पोलिसांमध्ये तक्रार करण्याचे आदेश बेस्ट प्रशासनाने दिले आहेत.
बेस्ट उपक्रमाच्या बसमधून दररोज लाखो मुंबईकर रोज प्रवास करतात. काही प्रवासी मोबाईलवरून अन्य व्यक्तींशी मोठ्या आवाजात संभाषण करीत असतात. काहीजण मोठ्या आवाजात गाणी ऐकत असतात. याचा सहप्रवासी तसेच वाहक आणि चालक यांनादेखील त्रास सहन करावा लागतो. वाहकाने प्रवाशाला समजावण्याचा प्रयत्न केला तरी त्याकडे लक्ष दिले जात नाही. बेस्ट उपक्रमाच्या परिवहन विभागाकडे याबाबत मोठ्या प्रमाणात तक्रारी प्राप्त झाल्या होत्या. त्याची दखल घेऊन मोबाईलवर मोठ्या आवाजात गाणी ऐकणाऱ्या प्रवाशांना अद्दल घडवण्याचा निर्णय घेण्यात आला. २४ एप्रिल रोजीच्या आदेशानुसार मोबाईलचा लाऊड स्पीकर वापरणाऱ्यांना समज देण्याची सूचना चालक- वाहक आणि तिकीट तपासणीस यांना करण्यात आली आहे.
संबंधित प्रवासी वाद घालत असेल तर पोलीस ठाण्यात तक्रार करण्यात येणार आहे. सह प्रवाशांना त्रास होऊ नये यासाठी बोलताना, गाणे ऐकताना इयर फोनचा वापर करण्यात यावा असे आवाहन 'बेस्ट' ने केले आहे.
कोणत्याही टिप्पण्‍या नाहीत:
टिप्पणी पोस्ट करा