पर्यावरण विषयक जागरुकता वाढविणारे प्रदर्शन - अतिरिक्त महानगरपालिका आयुक्त श्रीमती आश्विनी भिडे

बृहन्मुंबई महानगरपालिकेच्या उद्यान विभागाचे सामर्थ्य अधोरेखित करणारे 

बृहन्मुंबई महानगरपालिका व वृक्ष प्राधिकरण यांच्याद्वारे आयोजित ३ दिवसीय वार्षिक उद्यान प्रदर्शनाचा शुभारंभ

३ ते ५ फेब्रुवारीः सकाळी ८ ते रात्री ८ दरम्यान उद्यानविद्या प्रदर्शनासह कार्यशाळांचेही आयोजन आणि विक्री दालने

भायखळा पूर्व परिसरातील वीर माता जिजाबाई भोसले उद्यानाच्या परिसरात आयोजित करण्यात आलेले उद्यान प्रदर्शन हे बृहन्मुंबई महानगरपालिकेच्या उद्यान विभागाचे सामर्थ्य अधोरेखित करणारे प्रदर्शन असून यामुळे पर्यावरण विषयक जागरूकता वाढविण्यास देखील निश्चितपणे बळ मिळेल, असा विश्वास बृहन्मुंबई महानगरपालिकेच्या अतिरिक्त आयुक्त (पूर्व उपनगरे) श्रीमती आश्विनी भिडे यांनी व्यक्त केला. त्या आज बृहन्मुंबई महानगरपालिका व वृक्ष प्राधिकरण यांच्याद्वारे आयोजित वार्षिक उद्यान प्रदर्शनाच्या उद्घाटन कार्यक्रमात उपस्थितांशी संवाद साधताना बोलत होत्या. 

उद्यान प्रदर्शनाच्या उद्घाटन प्रसंगी उपायुक्त (शिक्षण) श्री. केशव उबाळे, उप आयुक्त (उद्याने) श्री. किशोर गांधी, 'इ' विभागाचे सहाय्यक आयुक्त श्री. अजयकुमार यादव, संचालक (प्राणिसंग्रहालय) श्री. संजय त्रिपाठी, उद्यान अधीक्षक श्री. जितेंद्र परदेशी यांच्यासह बृहन्मुंबई महानगरपालिकेचे संबंधित अधिकारी, कर्मचारी आणि विविध क्षेत्रातील मान्यवर व पर्यावरण प्रेमी मोठ्या संख्येने उपस्थित होते.

यंदा दिनांक ३ ते ५ फेब्रुवारी २०२३ दरम्यान भायखळा पूर्व परिसरातील वीरमाता जिजाबाई भोसले उद्यानात आयोजित हे भव्य प्रदर्शन येत्या रविवार पर्यंत म्हणजेच दि. ५ फेब्रुवारी २०२३ पर्यंत सकाळी ८ ते रात्री ८ या कालावधीत सर्वांसाठी मोफत खुले असणार आहे.

या वार्षिक प्रदर्शनासोबतच उद्यान या विषयाशी संबंधित विविध ११ बाबींवरील कार्यशाळांचे आयोजनही प्रदर्शन कालावधी दरम्यान करण्यात आले आहे. तर प्रदर्शना सोबतच उद्यान विषयक वस्तुंच्या विक्रींची ४२ दालने देखील या ठिकाणी उभारण्यात आली आहेत, अशी माहिती उद्यान अधीक्षक श्री. जितेंद्र परदेशी यांनी दिली आहे.

दरवर्षीच्या वार्षिक उद्यान प्रदर्शनामध्ये पाना-फुलांचा वापर करुन वैविध्यपूर्ण रचना सादर करण्यात येतात. या रचनांना देखील मुंबईकर नागरिकांचा आणि विशेष करुन लहान मुलांचा उत्स्फूर्त प्रतिसाद लाभत असतो. यंदाच्या प्रदर्शनात पेपा पिग फॅमिली, माशा अँड द बियर, ब्लुई, ट्वीटी आणि सिल्व्हेस्टर यांच्यासह नानाविध ‘कार्टून्स’ च्या रचना पानाफुलांपासून साकारण्यात आल्या आहेत. त्याचबरोबर पाना-फुलांपासून साकारलेले 'जी २०' चे बोधचिन्ह आणि 'जी २०' सदस्य देशांमधील झाडे - फुले आणि भाज्या यांचा देखील समावेश यंदाच्या उद्यान प्रदर्शनात आहे.

यासोबतच कुंड्यांमध्ये वाढविलेली फळझाडे व फुलझाडे, फळभाज्यांची झाडे, मोसमी फुलझाडे, औषधी वनस्पती, बोनसाय यांचे अक्षरशः शेकडो प्रकार मुंबईकरांना या प्रदर्शनात पहायला मिळत आहेत. तसेच मुंबई परिसरात अत्यंत दुर्मिळ असणा-या कृष्णवडासारख्या अनेक दुर्मिळ देशी प्रजातींची झाडे देखील यंदाच्या प्रदर्शनात बघता येत आहेत.

कोविड प्रादुर्भावामुळे दोन वर्षाच्या खंडानंतर होत असलेले यंदाचे उद्यान प्रदर्शन हे अधिक संस्मरणीय व्हावे, यासाठी महानगरपालिकेच्या उद्यान खात्यातील अधिकारी व कर्मचाऱ्यांनी अक्षरशः दिवस-रात्र मेहनत घेतली असून ही मेहनत प्रदर्शन बघताना प्रत्येक ठिकाणी जाणवत आहे, अशी प्रतिक्रिया प्रदर्शनाला भेट देणाऱ्या नागरिकांकडून व्यक्त होत आहे. 

(जसंवि/३९२)