गणना सर्वेक्षण पूर्ण
दिनांक २० सप्टेंबर २०२२ पर्यंत सुरु राहणार सर्वेक्षण
सर्वेक्षणाच्या आधारे पुढील सहा महिन्यांसाठी लसीकरण सत्रांचे नियोजन
मुंबई, दि. १२ : विविध आजारांपासून गर्भवती महिला आणि ० ते २ वर्षे वयाच्या आतील बालकांचे संरक्षण करण्यासाठी त्यांचे नियमित लसीकरण होणे आवश्यक असते. लसीकरणापासून ते वंचित राहू नयेत, यासाठी बृहन्मुंबई महानगरपालिकेच्या सार्वजनिक आरोग्य खात्यामार्फत दिनांक २९ ऑगस्‍ट २०२२ पासून घरोघरी जाऊन गणना सर्वेक्षण करण्यात येत आहे. आतापर्यंत १२ लाखांहून अधिक घरांचे सर्वेक्षण पूर्ण करण्यात आले असून दिनांक २० सप्टेंबर २०२२ पर्यंत ही सर्वेक्षण मोहीम सुरु राहील. सर्वेक्षणातील माहिती आधारे पुढील सहा महिन्यांच्या लसीकरण सत्रांचे नियोजन करण्यात येणार आहे.
बृहन्मुंबई महानगरपालिका क्षेत्रात नियमितपणे लसीकरण कार्यक्रम राबविण्‍यात येतो. या लसीकरण कार्यक्रमात ० ते २ वर्षे वयोगटातील बालकांना पोलिओ, काविळ, क्षयरोग, घटसर्प, धनुर्वात, डांग्‍या खोकला, गोवर, रुबेला, गालगुंड व रोटा व्हायरस-डायरिया, न्यूमोनिया यासारख्‍या आजारांपासून व गर्भवती महिलांचे लसीकरण करुन नवजात बालकांना धनुर्वात आजारापासुन संरक्षित करण्यात येते. सदर नियमित लसीकरण व पल्‍स पोलिओ लसीकरण मोहिमेमुळे सन २०१४ पासून भारत पोलिओमुक्‍त झाला आहे. तसेच नवजात बालकांमध्‍ये धनुर्वात आजाराचे निर्मूलन झाले आहे. त्याचप्रमाणे, गोवर, रुबेला या आजाराचे सन २०२४ पर्यंत निर्मूलन करण्याचे ध्येय ठेवून त्यादिशेने वाटचाल सुरु आहे.
सदर लसीकरण कार्यक्रम प्रभावीपणे अंमलात आणण्‍याच्या दृष्टीने अतिरिक्त महानगरपालिका आयुक्त (पश्चिम उपनगरे) डॉ. संजीव कुमार यांनी विशेष सर्वेक्षण करण्याचे निर्देश सार्वजनिक आरोग्य खात्याला दिले होते. त्यानुसार उपआयुक्त (सार्वजनिक आरोग्य) श्री. संजय कुऱहाडे व कार्यकारी आरोग्य अधिकारी डॉ. (श्रीमती) मंगला गोमारे यांच्या मार्गदर्शनाखाली दिनांक २९ ऑगस्‍ट २०२२ पासून घरोघरी जाऊन गणना सर्वेक्षण सुरु करण्यात आले आहे. दिनांक २० सप्टेंबर २०२२ पर्यंत हे सर्वेक्षण सुरु राहणार आहे. सहाय्यक प्रसाविका, आरोग्य समन्‍वयक, आशा व आरोग्य स्‍वयंसेविका या आरोग्य केंद्रातील कार्यरत कर्मचाऱयांमार्फत घरोघरी जाऊन ० ते २ वयोगटातील बालकांची तसेच गरोदर मातांची लसीकरणाबाबतची माहिती संकलित करीत आहेत.
या सर्वेक्षण मोहिमेत आतापर्यंत १२ लाख ५३ हजार घरांचे सर्वेक्षण पूर्ण झाले आहे. त्‍यातून ११ हजार ८३५ गर्भवती महिला आणि ० ते २ वयोगटातील ५४ हजार १३८ बालकांची यादी तयार करण्यात आली आहे. संपूर्ण सर्वेक्षण झाल्‍यानंतर सर्व बालकांची व गरोदर मातांची माहितीनुसार यादी तयार करुन पुढील सहा महिन्‍यांकरीता लसीकरण सत्रांचे नियोजन करण्यात येणार आहे.
या लसीकरण मोहिमेमुळे बृहन्मुंबई महानगरपालिका क्षेत्रातील ० ते २ वयोगटातील बालकांना व गर्भवती महिलांना पोलिओ, काविळ, क्षयरोग, घटसर्प, धनुर्वात, डांग्‍या खोकला, गोवर, रुबेला, गालगुंड व रोटा व्हायरस-डायरिया यासारख्‍या आजारांपासून संरक्षण मिळणार असल्‍याने सदर सर्वेक्षण आणि लसीकरण मोहीम महत्‍वाची आहे. ‘माझे कुटुंब-माझी जबाबदारी’ या मोहिमेला ज्याप्रमाणे मुंबईकर नागरिकांनी सहकार्य केले व उत्स्फुर्तपणे सहभाग घेतला, त्याचप्रमाणे सदर गणना सर्वेक्षण मोहिमेला सहकार्य करावे, आरोग्य कर्मचाऱयांना आवश्यक ती माहिती द्यावी, जेणेकरुन ० ते २ वर्षे वयोगटातील सर्व बालकांचे तसेच गर्भवती महिलांचे १०० टक्के नियमित लसीकरण करता येईल, असे आवाहन बृहन्मुंबई महानगरपालिका प्रशासनाच्या वतीने करण्यात येत आहे.
(जसंवि/२३१)
कोणत्याही टिप्पण्‍या नाहीत:
टिप्पणी पोस्ट करा