जी/दक्षिण आणि जी/उत्तर विभागातील काही परिसरांमध्ये पाणीपुरवठा बंद;

 सोमवार, १४ मार्च २०२२ रोजी सकाळी ८ ते मंगळवार, १५ मार्च २०२२ रोजी दुपारी २ वाजेपर्यंत

तर जी/दक्षिण विभागातील काही परिसरांमध्ये कमी दाबाने पाणीपुरवठा

बृहन्‍मुंबई महानगरपालिकेतर्फे लोअर परळ येथे सेनापती बापट मार्गावर गावडे चौकात १४५० मिलीमीटर व्यासाच्या  तानसा पूर्व व पश्चिम मुख्य जलवाहिनीवरील गळती दुरुस्त करण्याचे काम हाती घेण्यात येणार आहे. सदर काम सोमवार दिनांक १४ मार्च २०२२ रोजी सकाळी ८.०० वाजता सुरु होऊन ते मंगळवार दिनांक १५ मार्च २०२२ रोजी दुपारी २.०० वाजेपर्यंत पूर्ण करण्यात येणार आहे. यास्तव, सदर कालावधीत महानगरपालिकेच्या जी/दक्षिण आणि जी/उत्तर विभागातील काही परिसरांमध्ये पाणीपुरवठा होणार नाही. तर जी/दक्षिण विभागातील काही परिसरांमध्ये कमी दाबाने पाणीपुरवठा होईल.

त्याचा सविस्तर तपशील पुढीलप्रमाणे आहे.

१) जी/दक्षिण विभागः डिलाई रोड बी. डी. डी., संपूर्ण प्रभादेवी परिसर, जनता वसाहत,  संपूर्ण  लोअर परळ विभाग, पांडुरंग बुधकर मार्ग, सेनापती बापट मार्ग, गणपतराव कदम मार्ग, ना. म. जोशी मार्ग, वीर सावरकर मार्ग, एस. एस. अमृतवार मार्ग - (सोमवार दिनांक १४ मार्च २०२२ रोजी दुपारी २.३० ते दुपारी ३.३० वाजता डिलाई रोड पाणीपुरवठा आणि दुपारी ३.३० ते सायंकाळी ७.०० वाजता शहर पाणीपुरवठा - (ही नियमित पाणीपुरवठ्याची वेळ) - पाणीपुरवठा होणार नाही).

२) जी/उत्तर विभागः संपूर्ण प्रभादेवी परिसर, सेनापती बापट मार्ग, वीर सावरकर मार्ग, गोखले मार्ग, एल. जे. मार्ग, सयानी मार्ग, भवानी शंकर  मार्ग, सेनाभवन परिसर, मोरी मार्ग, टी. एच. कटारिया मार्ग, कापड बाजार, पूर्ण माहीम (पश्चिम) विभाग, माटुंगा (पश्चिम) विभाग, दादर (पश्चिम) विभाग - (सोमवार दिनांक १४ मार्च २०२२ रोजी दुपारी ४.०० ते सायंकाळी ७.०० वाजता तसेच सायंकाळी ७.०० ते रात्री १०.०० वाजता - (ही नियमित पाणीपुरवठ्याची वेळ) - पाणीपुरवठा होणार नाही).

३) जी/दक्षिण विभागः ना. म. जोशी मार्ग, डिलाई रोड बी.डी.डी., सखाराम बाळा पवार मार्ग, महादेव पालव मार्ग - (मंगळवार दिनांक १५ मार्च २०२२ रोजी पहाटे ४.३० ते सकाळी ७.४५ वाजता डिलाई रोड पाणीपुरवठा - (ही नियमित पाणीपुरवठ्याची वेळ) - पाणीपुरवठा होणार नाही)

४) जी/दक्षिण विभागः धोबीघाट, सातरस्ता - (मंगळवार दिनांक १५ मार्च २०२२ रोजी पहाटे ४.०० ते सकाळी ७.०० वाजता डिलाई रोड पुरवठा - (ही नियमित पाणीपुरवठ्याची वेळ) - पाणीपुरवठा कमी दाबाने होईल)

संबंधीत परिसरातील नागरिकांना आवाहन करण्यात येते की, उपरोक्त नमूद कालावधीत पाणीकपातीपूर्वी अगोदरच्या दिवशी पाण्याचा आवश्यक साठा करुन ठेवावा. तसेच, कपातीच्या कालावधीत काटकसरीने पाणी वापरुन सहकार्य करावे, अशी विनंती बृहन्मुंबई महानगरपालिका प्रशासनाच्या वतीने करण्यात येत आहे.

(जसंवि/६१४)