महाराष्ट्र लघु
उद्योग विकास महामंडळाच्या दिल्लीस्थित ‘म-हाटी’ महाराष्ट्र एम्पोरियमच्या दालनात गणेशमूर्ती आणि पूजेच्या साहित्याचे
प्रदर्शन व विक्रीला सुरुवात झाली आहे. प्रदर्शन व विक्री १० सप्टेंबरपर्यंत सुरु राहणार आहे.
महाराष्ट्रातील मूर्तीकारांच्या कलेला प्रोत्साहन
मिळावे व त्यांच्या मुर्तींना बाजारपेठ उपलब्ध व्हावी तसेच, दिल्लीतील
मराठी व अमराठी गणेशभक्तांना गणेशमूर्ती उपलब्ध करुन देण्याच्या उद्देशाने
दिल्लीस्थित महाराष्ट्र लघु उद्योग विकास महामंडळाच्यावतीने गेल्या २९ वर्षांपासून
गणेशमूर्ती व पूजेच्या साहित्याची विक्री व प्रदर्शन भरवण्यात येत आहे. दिल्ली व
राष्ट्रीय राजधानी परिक्षेत्रात ४० गणेश मंडळांमध्ये गणेशोत्सव साजरा होतो.अमराठी
भक्तांचाही गणेशोत्सवात मोठया प्रमाणात सहभाग असतो.
महाराष्ट्र एम्पोरियमच्या दालनात गणेशमूर्ती व
पूजेचे साहित्य खरेदीसाठी लोकांची वर्दळ सुरु झाली आहे. कोविड-१९
महामारीच्या पार्श्वभूमीवर ग्राहकांची गर्दी होणार नाही
याची काळजी घेण्यात आली आहे. मास्क, सॅनिटायजरचा
अनिवार्य वापर आणि सोशल डिस्टेसिंगचे पालन
करून गणेशमूर्ती व पूजेच्या साहित्याची खरेदी होत आहे. गणेशमुर्तींच्या उंचीलाही
मर्यादा असून येथे प्रदर्शन व विक्रीकरिता असलेल्या मूर्तीची कमाल उंची ३ फुट आहे. दिल्लीस्थित नंदा एस्कोर्टसह अन्य गणेश मंडळांनी गणरायाच्या मोठ्या मुर्ती राखीव करून ठेवल्या
आहेत.
ठाणे येथील मंदार सुर्यकांत शिंदे हे
मागील २३ वर्षांपासून गणेशमूर्ती
विक्रीकरिता दिल्लीतील ‘म-हाटी’एम्पोरियमध्ये
येतात. एम्पोरियमच्या दालनात यंदा लहान मोठ्या आकाराच्या एकूण ८00 गणेशमूर्ती आहेत. या सर्वच मुर्ती इकोफ्रेंडली आहेत. 6 इंच ते ३ फुटापर्यंतच्या
गणरायाच्या मूर्ती येथे उपलब्ध असून ५००
रूपयांपासून ते २6 हजार रूपयांपर्यंत
त्यांची किंमत आहे.
महामंडळाच्या बाबा खडकसिंह मार्गवरिल ‘म-हाटी’ महाराष्ट्र एम्पोरियम या दालनात गणेशचतुर्थी
अर्थात १० सप्टेंबर २०२१ पर्यंत सकाळी 10 ते सायंकाळी ६
वाजेपर्यंत हे प्रदर्शन व विक्री सुरु राहणार आहे. अधिक
माहितीकरिता महामंडळाच्या 011-23363366 या दूरध्वनी क्रमांकावर
संपर्क करता येणार आहे.
वि.वृ.क्र १९२ / दि. ०१.०९.२०२१
कोणत्याही टिप्पण्‍या नाहीत:
टिप्पणी पोस्ट करा