मुंबई, दादासाहेब येंधे : चित्रपट निर्माते रोहित शेट्टी यांच्या जुहू येथील निवासस्थानावर झालेल्या गोळीबार प्रकरणात पोलिसांनी मोठी कारवाई करत फरार आरोपी प्रदीप शर्मा उर्फ 'गोलू' (वय, २३) याला आग्रा येथून अटक केली आहे. उत्तर प्रदेश एसटीएफ आणि मुंबई क्राईम ब्रँचच्या संयुक्त मोहिमेत ही कारवाई पार पडली. या अटकेमुळे प्रकरणातील अटक आरोपींची संख्या आता १४ वर पोहोचली आहे.
१ फेब्रुवारीच्या रात्री झालेल्या या गोळीबारासाठी प्रदीपने विष्णू कुशवाहा आणि दीपक या दोघांना तयार केले होते. त्यांनीच प्रत्यक्षात अंधाधुंद गोळीबार केला. याआधीही २८ मे २०२५ रोजी राजस्थानातील श्रीगंगानगर येथे प्रदीपने अशाच प्रकारचा गुन्हा केल्याचे समोर आले आहे. या प्रकरणात यापूर्वी मुख्य शूटर दीपक, विष्णू कुशवाहा तसेच शुभम लोणकरचा भाऊ प्रवीण लोणकर यासह १३ जणांना अटक करण्यात आली होती. प्रवीण लोणकर हा बाबा सिद्दीकी हत्या प्रकरणात आर्थर रोड तुरुंगात असताना त्याने 'लॉजिस्टिक' मदत केल्याचेही उघड झाले आहे.
दरम्यान, प्रदीप शर्मा उर्फ गोलू हा या प्रकरणातील १४वा आरोपी असून त्याच्यावर मोक्का कायद्यांतर्गत कारवाई करण्यात आली आहे. अशी माहिती मुंबई क्राईम ब्रँचकडून देण्यात आली आहे.
0 टिप्पण्या