मुंबई, दादासाहेब येंधे : मुंबईत एका विदेशी महिलेचा पाठलाग करून तिची छेडछाड केल्याप्रकरणी आग्रीपाडा पोलिसांनी दोन आरोपींना अटक केली आहे. यातील मुख्य आरोपीला बिहारमधून ताब्यात घेण्यात आले आहे. धोबीघाट परिसरात परदेशी महिला पर्यटक आणि कंटेंट क्रिएटरची छेड काढल्याची घटना समोर आली होती. आयनस फारिया (वय अंदाजे २८) ही पोर्तुगालची कंटेंट क्रिएटर भारत फिरण्यासाठी मुंबईत आली असताना २२ फेब्रुवारी रोजी दुपारच्या सुमारास तिच्यासोबत हा प्रकार घडला होता.
याप्रकरणी आग्रीपाडा पोलीस ठाण्यात गुन्हा दाखल करून तपासासाठी विशेष पथके तयार करण्यात आली होती. तांत्रिक तपास आणि सीसीटीव्ही फुटेजच्या आधारे गुलशनकुमार नरेश शर्मा (वय, २० वर्ष) याला २८ फेब्रुवारी रोजी मलबार हिल येथील एका बांधकाम साईटवरून ताब्यात घेऊन अटक करण्यात आली. गुन्ह्यातील मुख्य आरोपी मनसुखकुमार चंदकिशोर शर्मा (वय, २२ वर्ष) हा त्याच्या गावी बिहार येथे पळून गेला होता. पोलिसांनी त्याला बिहारमधून अटक केली. या प्रकरणाचा अधिक तपास आग्रीपाडा पोलीस करत आहेत.
0 टिप्पण्या