पावसाळा विषयक कामांची नियमित पडताळणी करण्याचे आणि 'मॅन होल' तपासणी नियमितपणे करण्याचेही निर्देश
येत्या पावसाळ्याच्या पार्श्वभूमीवर
बृहन्मुंबई महानगरपालिकेच्या प्रशासक महोदयांच्या मार्गदर्शनात पावसाळा पूर्वतयारी
बाबत विशेष बैठक संपन्न
येत्या पावसाळ्याच्या पार्श्वभूमीवर मुंबई महानगरपालिकेच्या विविध खात्यांसह महानगरपालिका क्षेत्रातील ज्या-ज्या यंत्रणेद्वारे विविध स्तरीय कार्यवाही केली जाते; त्या सर्व यंत्रणांनी आपापल्या स्तरावर नियमितपणे कामांची पाहणी करावी, सर्व संबंधित कामे वेळच्या वेळी पूर्ण करवीत आणि इतर यंत्रणांसोबत सुसमन्वय साधावा; असे निर्देश बृहन्मुंबई महानगरपालिकेचे प्रशासक डॉ. इकबाल सिंह चहल यांनी दिले आहेत.
त्याचबरोबर विविध सेवा
देणाऱ्या संस्थांद्वारे उपयोगितांसाठी रस्ते-पदपथ खोदले जातात. या ठिकाणचा
राडारोडा (Debris) वेळच्या वेळी न हटविल्यास हा
राडारोडा पावसामुळे वाहून जाऊन विविध ठिकाणी पाणी तुंबू शकते. ही शक्यता लक्षात
घेऊन वेळच्या वेळी असा राडारोडा न हटविणा-या संस्थांविरोधात पोलीस तक्रार दाखल
करण्याचे निर्देश महानगरपालिकेचे प्रशासक डॉ. चहल यांनी महापालिकेच्या सर्व
संबंधित सह आयुक्त व उपायुक्तांना आज दिले आहेत.
बृहन्मुंबई महानगरपालिकेचे
प्रशासक डॉ. इकबाल सिंह चहल यांच्या मार्गदर्शनात पावसाळापूर्व तयारी च्या
अनुषंगाने एका विशेष बैठकीचे आयोजन आज महापालिका मुख्यालयातील समिती सभागृह
क्रमांक २ येथे करण्यात आले होते. त्याप्रसंगी उपस्थितांशी संवाद साधताना ते बोलत
होते. या बैठकीला 'बेस्ट' उपक्रमाचे
महाव्यवस्थापक श्री. लोकेशचंद्र, अतिरिक्त महानगरपालिका
आयुक्त (पूर्व उपनगरे) श्रीमती आश्विनी भिडे, अतिरिक्त
महानगरपालिका आयुक्त (प्रकल्प) श्री. पी. वेलरासू, अतिरिक्त
महानगरपालिका आयुक्त (शहर) डॉ. संजीव कुमार, महानगरपालिका
आयुक्त (पश्चिम उपनगरे) श्री. सुरेश काकाणी, संबंधित सह
आयुक्त, उपायुक्त, सहाय्यक आयुक्त,
विविध खात्यांचे प्रमुख यांच्यासह आपत्कालीन व्यवस्थापन खात्याचे
संचालक श्री महेश नार्वेकर आणि विविध यंत्रणांचे संबंधित अधिकारी उपस्थित होते.
आज संपन्न झालेल्या
पावासाळापूर्व समन्वय बैठकी दरम्यान झालेली चर्चा, अनुषंगिक
निर्णय याबाबतची माहिती पुढीलप्रमाणे आहेः
· आजच्या बैठकीच्या सुरुवातीला प्रशासक महोदय यांनी विविध खात्यांनी व
यंत्रणांनी केलेल्या पावसाळापूर्व कामांचा संक्षिप्त आढावा घेतला. तसेच विविध
पावसाळापूर्व विविध कामे ही निर्धारित वेळापत्रकानुसारच वेळच्यावेळी करण्याचे
निर्देश.
· पावसाच्या पाण्याचा निचरा संथ गतीने होणाऱ्या ठिकाणी यापूर्वी आदेशित
करण्यात आलेल्या नुसार आवश्यक ती कार्यवाही तातडीने करण्याचे आदेश.
· बृहन्मुंबई महानगरपालिका क्षेत्रातील सर्व 'मॅन होल'
व संरक्षक जाळ्या याबाबत नियमितपणे पाहणी व पडताळणी करण्याचे
निर्देश. यासाठी सर्व २४ विभागांच्या सहाय्यक आयुक्तांच्या स्तरावर कार्यवाही
करण्याचे निर्देश
· 'मुंबई मेट्रो रेल्वे महामंडळ मर्यादित' व 'मुंबई महानगर प्रदेश विकास प्राधिकरण' (MMRDA) यांच्याद्वारे
विविध कामे सुरु आहेत. या अनुषंगाने येत्या पावसाळ्याच्या पार्श्वभूमीवर त्यांच्या
स्तरावर सुसमन्वय साधण्याचे निर्देश
· पूर्व व पश्चिम द्रुतगती महामार्गांवर पाणी साचू नये किंवा खड्डे पडू नयेत, यासाठी आवश्यक ती सर्व काळजी घेण्याचे संबंधित यंत्रणेला निर्देश. तसेच या
दोन्ही महामार्गांलगत असणाऱ्या 'कल्व्हर्ट'ची सुयोग्यप्रकारे साफसफाई करण्याचे निर्देश
· बृहन्मुंबई महानगरपालिकेच्या उद्यान खात्याने पावसाळा पूर्वतयारीचा भाग
म्हणून त्यांच्या अखत्यारीतील झाडांची छाटणी वेळच्या वेळी व शास्त्रोक्त पद्धतीने
करण्याचे उद्याने खात्याला निर्देश
· रस्त्यांची सुरू असलेली कामे ही येत्या १५ मे पर्यंत निर्धारित
वेळापत्रकानुसार पावसाळ्यापूर्वी करण्याचे रस्ते खात्याला तसेच संबंधित यंत्रणांना
निर्देश
· विद्युत पुरवठ्याबाबत 'बेस्ट'
उपक्रमासह सर्व संबंधित वीज पुरवठादार कंपन्यांनी पावसाळ्यात
उद्भवणाऱ्या बाबींच्या अनुषंगाने सजग व तत्पर राहण्याचे निर्देश
· ज्या ठिकाणी दरड कोसळण्याचा धोका आहे, अशा
ठिकाणाबाबत निर्धारित करण्यात आलेल्या बाबींची तातडीने कार्यवाही करण्याचे संबंधित
यंत्रांना निर्देश
· पावसाळ्यातील संभाव्य आपत्तींच्या अनुषंगाने भारतीय नौदल, राष्ट्रीय आपत्ती प्रतिसाद पथक व बृहन्मुंबई महानगरपालिकेचे मुंबई
अग्निशमन दल यांना आवश्यक त्या सर्व तयारीसह मदतीसाठी तैनात राहण्याचे निर्देश
· साथ रोगांच्या प्रादुर्भावाची शक्यता लक्षात घेऊन महापालिकेच्या सार्वजनिक
आरोग्य खात्याने आवश्यक त्या सर्व साधनसामुग्रीसह सुसज्ज राहण्याचे आदेश
· बृहन्मुंबई महानगरपालिका क्षेत्राशी संबंधित हवामान विषयक माहिती सुनिश्चित
कार्यपद्धतीनुसार वेळच्यावेळी बृहन्मुंबई महानगरपालिकेच्या आपत्कालीन व्यवस्थापन
खात्याला देण्याचे निर्देश देखील आजच्या बैठकीदरम्यान संबंधितांना देण्यात आले.
कोणत्याही टिप्पण्‍या नाहीत:
टिप्पणी पोस्ट करा