आठ तास ड्युटी करण्याबाबत दोन पर्याय
मुंबई, दादासाहेब येंधे : मुंबईचे पोलीस आयुक्त संजय पांडे यांनी जागतिक महिला दिनी महिला पोलीस अंमलदारांना आठ तास ड्युटीची भेट देऊन खुश केले आहे. मुंबई पोलीस दलात काम करणारे बहुतांश पोलीस अंमलदार हे मुंबईच्या बाहेरून कामावर येत असल्यामुळे त्यांचे अनेक तास प्रवासातच खर्च होतात. त्यात बारा तास ड्यूटी केल्यानंतर प्रवासात आणखी दीड ते दोन तास जात असल्यामुळे त्यांना कुटुंबाकरिता वेळ मिळत नाही. त्यात महिला आमदारांची अधिकच पंचायत होते.
आठ तास ड्युटी करण्याबाबत आणि प्रस्ताव पाठविण्यात आले होते. प्रायोगिक तत्त्वावर आठ तास ड्युटी करण्यात देखील आली होती. मात्र मनुष्यबळाअभावी हे शक्य होत नसल्यामुळे पुन्हा पोलीस अंमलदार यांची ड्युटी पूर्ववत करण्यात आली. त्यामुळे पोलीस अंमलदार विशेष करून महिला अंमलदार यांच्यात नाराजीचा सूर दिसून येत होता.
अखेरीस पोलीस आयुक्त संजय पांडे यांनी महिला दिनाचे औचित्य साधून मुंबई पोलीस दलातील महिला अंमलदार यांना महिला दिनी भेट म्हणून आठ तास ड्युटी देण्याची घोषणा केली आहे. याबाबतचे आदेश पोलिस आयुक्तांनी सोमवारी काढले असून मुंबईतील प्रत्येक पोलीस ठाण्यातील वरिष्ठ पोलीस निरीक्षक यांना हे लेखी आदेश पाठविण्यात आले असून लवकरात लवकर या आदेशाची अंमलबजावणी करण्यात यावी असे त्यात म्हटले आहे.
मुंबई पोलीस आयुक्त संजय पांडे यांनी लेखी आदेशात वरिष्ठ पोलीस निरीक्षक यांना आठ तास ड्युटी करण्याबाबत दोन पर्याय दिले असून या दोन पर्यायांपैकी एक पर्याय निवडून त्याप्रमाणे महिला अंमलदार यांना ड्युटीचे वाटप करण्यात यावे असे म्हटले आहे. महिला पोलीस अंमलदार हे आतापर्यंत दोन शिफ्टमध्ये काम करत होते. मात्र आठ तास ड्युटी झाल्यानंतर त्यांना तीन शिफ्टमध्ये काम करावे लागणार आहे.
पर्यायी शिफ्टची वेळ अशी असेल
१) सकाळी ८ ते दुपारी ३ वाजेपर्यंत पहिली शिफ्ट दुपारी ३ ते रात्री १० पर्यंत दुसरी शिफ्ट आणि रात्री १० ते सकाळी ८ पर्यंत तिसरी शिफ्ट असणार आहे.
२) सकाळी ७ ते दुपारी ३ वाजेपर्यंत पहिली शिफ्ट दुपारी ३ ते ११ वाजेपर्यंत दुसरी शिफ्ट आणि रात्री ११ ते सकाळी ७ वाजेपर्यंत तिसरी शिफ्ट.
वरील दोन्ही पर्यायांपैकी एक पर्याय ठाण्यातील वरिष्ठ पोलीस निरीक्षक यांनी ड्युटीचे वाटप करावे असे आदेशात म्हटले आहे.
व्हायरल पत्र
कोणत्याही टिप्पण्‍या नाहीत:
टिप्पणी पोस्ट करा